Ukrayna ordusu Rusiya ilə müharibədə texnoloji innovasiyalarla diqqət çəkməyə davam edir. Kiyev rəhbərliyi cəbhə xəttində döyüşən əsgərlərin motivasiyasını artırmaq və döyüş effektivliyini yüksəltmək məqsədilə yeni bir sistem tətbiq edib. “Dron Ordusu: Bonus” və ya ictimaiyyətdə tanınan adı ilə “e-xal proqramı” adlanan bu təşəbbüs müharibəyə oyunlaşdırma (gamification) yanaşması gətirir.

Sfera.az “NTV”yə istinadən xəbər verir ki, bu sistemə əsasən, Ukrayna əsgərləri hər vurduqları rus hərbçisi və ya məhv etdikləri hərbi texnika üçün xal qazanırlar.

Toplanan xallar daha sonra müxtəlif hərbi avadanlıqların alınmasında istifadə olunur. Müdafiə Nazirliyi bu yanaşmanı “müharibənin riyazi modeli” kimi təqdim edir.

İlkin mərhələdə bir rus əsgərinin öldürülməsi 2 xal dəyərində qiymətləndirilirdisə, hazırda bu rəqəm 6-ya qaldırılıb. Bu dəyişiklik, Rusiya ordusunun son zamanlar kiçik dəstələrlə və motosikletli qruplarla hücum etməsi fonunda həyata keçirilib. Beləliklə, fərdi əsgərlərin strateji rolu daha da artıb.

Rəqəmsal Transformasiya naziri Mixaylo Fedorovun sözlərinə görə, sistem yalnız logistik vasitə deyil, eyni zamanda psixoloji təsir gücünə malikdir:

“Xal dəyərlərini dəyişəndə döyüşçülərin motivasiyası dərhal dəyişir”.

Əldə olunan xallar sadəcə statistik göstərici kimi deyil, real fayda kimi istifadə edilir. Əsgərlər bu xalları “Brave 1 Market” adlı onlayn platformada istifadə edərək 1600-dən çox məhsul – dronlar, zirehli geyimlər, texniki detallar və hətta pilotsuz quru texnikaları əldə edə bilirlər. Məhsullar birbaşa istehsalçılardan alınır və bütün ödənişlər Müdafiə Nazirliyi tərəfindən qarşılanır.

Sistem xüsusilə ön cəbhədə döyüşən bölmələrin təchizatını sürətləndirməyə hesablanıb. Bu yanaşma klassik hərbi təchizat sistemlərinə alternativ olaraq daha çevik və məqsədyönlü hesab olunur.

Kiyevdə, adı açıqlanmayan bir binada fəaliyyət göstərən görüntü analiz komandası isə hər gün minlərlə dron çəkilişini analiz edir. Qiymətləndirmə “vurulan” və “tamamilə məhv edilən” olmaqla iki əsas kateqoriya üzrə aparılır.

Maraqlı məqamlardan biri isə odur ki, canlı ələ keçirilən rus əsgərləri öldürülənlərdən daha yüksək xal gətirir. Rəsmilərin izahına görə, əsirlər mübadilə və danışıqlarda əhəmiyyətli diplomatik resurs sayılır.

Rəsmi məlumatlara görə, e-xal proqramına Ukrayna ordusunun 90 faizindən çoxu qoşulub. Sistem həm taktiki üstünlük, həm də döyüş ruhunun qorunması baxımından əsas alət kimi dəyərləndirilir.

Bəsti Rəfizadə
Sfera.az

Müharibə oyuna çevrildi: Ukrayna xal sistemindən faydalanır