İstanbulda Rusiya və Ukrayna nümayəndə heyətləri arasında keçirilən görüşlərdən sonra Kreml mümkün Putin-Tramp-Zelenski görüşü ilə bağlı açıqlama yayıb. Kremlin sözçüsü Dmitri Peskov belə bir üçtərəfli görüşün yaxın gələcəkdə mümkün olmadığını bildirib.

Sfera.az xəbər verir ki, Peskov, Rusiya ilə Ukrayna arasında davam edən münaqişənin mürəkkəbliyini vurğulayaraq, danışıqlarda sürətli irəliləyiş gözləməyin real olmadığını qeyd edib. O, Ukrayna ilə sülh razılaşmasına nail olmağın son dərəcə çətin olduğunu bildirib.

Kremlin sözçüsü əlavə edib ki, Türkiyə Prezidenti Rəcəb Tayyib Ərdoğanla Vladimir Putin arasında görüş hələ gündəmdə deyil. Bununla belə, Ukrayna məsələsi ilə bağlı ABŞ ilə təmasların davam etdiriləcəyini vurğulayıb. Peskovun sözlərinə görə, Donald Tramp və Vladimir Putin arasında gələcəkdə mümkün ola biləcək görüşlərlə bağlı konkret razılaşma mövcud deyil. Bununla yanaşı, Putin yüksək səviyyəli danışıqlara açıqdır və belə görüşlərin ciddi hazırlıq tələb etdiyini qeyd edib.

Kremlin nümayəndəsi Rusiyanın İstanbul danışıqları çərçivəsində əldə olunan razılaşmalara sadiq qalacağını bəyan edib. Bundan əlavə, Peskov Ukraynanın Rusiyadakı bombardmançı təyyarələrə dair iddiaları ilə bağlı da açıqlama verib. O bildirib ki, Prezident Putin bu məsələ ilə bağlı daim məlumatlandırılır və hadisə ilə əlaqədar araşdırma aparılır.

Rusiyanın Ukrayna ilə bağlı hər hansı güzəştə getməyə hazır olub-olmaması sualına cavab verən Peskov, bu cür məsələlərin ictimaiyyət qarşısında deyil, qapalı görüşlərdə müzakirə edilməli olduğunu vurğulayıb.

Bəsti Rəfizadə
Sfera.az

Rusiya-Ukrayna danışıqlarında irəliləyiş mümkün deyil – Kremlin mövqeyi