İngiltərə müharibəyə hazırlaşır - Yeni müdafiə planı açıqlandı
İngiltərə Baş naziri Keir Starmer ölkəsinin Soyuq müharibədən bu yana ən ciddi hərbi təhdidlərlə üz-üzə olduğunu açıqlayıb. Baş nazirin bu bəyanatı Britaniyanın yeni hücum tipli nüvə sualtı qayıqlarının inşa ediləcəyi Qlazqodakı gəmiqayırma zavodunda səsləndirilib.
Sfera.az xarici mediaya istinadən xəbər verir ki, Starmer çıxışında Rusiyanı Avropaya qarşı aqressivlikdə ittiham edərək bildirib ki, təhlükə həm təcili, həm də proqnozlaşdırıla bilməz xarakter daşıyır. O, “Bu səbəbdən müharibəyə hazır olmalıyıq”, – deyə xəbərdarlıq edib.
İngiltərə hökuməti NATO-nun keçmiş baş katibi Corc Robertsonun rəhbərliyi ilə hazırlanmış strateji müdafiə hesabatına əsaslanaraq ordunun yenidən qurulması və gücləndirilməsi ilə bağlı genişmiqyaslı proqram elan edib. Hesabatda ölkənin 7 min uzaqmənzilli raketlə təchiz olunması, yeni kiber komanda mərkəzinin yaradılması və nüvə imkanlarının artırılması tövsiyə olunur.
Hökumətin qəbul etdiyi yeni müdafiə planına əsasən 12 yeni hücum sualtı qayığı inşa ediləcək, PUA istehsalı artırılacaq, silah-sursat ehtiyatları genişləndiriləcək, kiber təhlükəsizliyə 1,35 milyard dollar sərmayə yönəldiləcək, ordunun şəxsi heyətinin artırılması və yaşayış şəraitinin yaxşılaşdırılması üçün 2,025 milyard dollar ayrılacaq.
Eyni zamanda, məktəblərdə hərbi təhsilin gücləndirilməsi və gənclərin silahlı qüvvələrə marağının artırılması məqsədilə yeni maarifləndirici proqramlar da nəzərdə tutulub. Hökumət ehtiyat qüvvələrin səfərbərliyi üçün hüquqi dəyişikliklərə hazırlaşır.
Müdafiə planları çərçivəsində İngiltərə ABŞ və Avstraliya ilə birlikdə yaratdığı AUKUS ittifaqı vasitəsilə nüvə sualtı qayıq donanmasını genişləndirməyi planlaşdırır. Lakin Donald Trampın ABŞ-də yenidən seçilməsi və onun NATO-ya münasibətdə nümayiş etdirdiyi mövqe, Londonu müttəfiqlərinə etimadı yenidən nəzərdən keçirməyə vadar edib.
“Financial Times” yazır ki, İngiltərə bu addımı ABŞ Donanmasının Avropadan qismən və ya tam çəkilmə ehtimalı fonunda atmağa qərar verib. Bu, eyni zamanda Rusiyaya qarşı hərbi çəkindiriciliyi artırmaq məqsədi daşıyır.
Ekspertlər bildirirlər ki, sualtı qayıqlar ABŞ-nin geri çəkilməsi halında tam təminat verməsə də, müəyyən qədər təhlükəsizlik zəmanəti yarada bilər.
İngiltərə həmçinin taktiki nüvə silahı daşıya bilən yeni təyyarələr almağı planlaşdırır. Bu, ölkənin ABŞ-dən olan nüvə asılılığını azaltmaq məqsədi daşıyır. Liberal Demokrat partiyasının deputatı Mayk Martin bu addımı “Britaniyanın Avropa təhlükəsizliyində artıq tam şəkildə ABŞ-yə güvənmədiyinin açıq göstəricisi” kimi dəyərləndirib.
Ekspertlərin fikrincə, əsas hədəf Rusiyanın nüvə təhdidlərinə qarşı cavab vermək üçün hava yolu ilə nüvə zərbəsi endirmək imkanına sahib olmaqdır.
Bəsti Rəfizadə
Sfera.az
