Danışıqlar Yenidən İstanbulda olacaq? - Moskva cavab gözləyir

Rusiya tərəfi Ukrayna nizamlanması üzrə danışıqların növbəti raundunun iyunun 2-də İstanbulda keçirilməsi təklifinə hələ ki, rəsmi Kiyevdən cavab almayıb.

Sfera.az “TASS” agetliyinə istinadən xəbər verir ki, bu barədə Rusiya prezidentinin mətbuat katibi Dmitri Peskov bildirib.

Rusiyanın xarici işlər naziri Sergey Lavrov Rusiya və Ukrayna nümayəndə heyətlərinin ikinci birbaşa görüşünün iyunun 2-də İstanbulda keçirilməsi təklifini açıqlayıb. 

Lavrovun sözlərinə görə, orada prezidentin köməkçisi Vladimir Medinskinin başçılıq etdiyi Rusiya nümayəndə heyəti münaqişənin həlli üçün şərtləri əks etdirən memorandumunu Ukrayna nümayəndə heyətinə təhvil verməyə hazır olacaq. Memorandum Rusiyanın böhranın əsas səbəblərini etibarlı şəkildə aradan qaldırmağın bütün aspektləri üzrə mövqeyini ifadə edir.

Qeyd edək ki, nümayəndə heyətlərinin ilk görüşü mayın 16-da İstanbulda baş tutub. Daha sonra onlar əsirləri 1000-dən 1000-ə dəyişdirmək və davamlı nizamlanmaya nail olmaq üçün hər bir tərəfin mövqeyini əks etdirən sənədlər hazırlamaq barədə razılığa gəliblər.

Fidan Hacızadə
Sfera.az