İran və ABŞ arasında nüvə proqramı ilə bağlı mümkün razılaşma fonunda İranın Atom Enerjisi Təşkilatının (AEOI) rəhbəri Məhəmməd Eslami açıqlama edib.

Sfera.az bu barədə “TASS”agentliyinə istinadən xəbər.

O bildirib ki, Tehran nüvə obyektlərinə MAQATE-nin (Beynəlxalq Atom Enerjisi Agentliyi) amerikalı müfəttişlərini buraxmağı nəzərdən keçirə bilər.

“Adətən düşmən ölkələrin müfəttişlərinə icazə verilmir, lakin əgər nüvə sazişi imzalansa, MAQATE-də çalışan amerikalı müfəttişlərin ölkəmizin nüvə obyektlərinə daxil olmasına icazə verilə bilər”, - deyə Elsami qeyd edib.

AEOI rəhbəri İranın nüvə proqramının yalnız dinc məqsədlər üçün nəzərdə tutulduğunu bir daha vurğulayıb və əlavə edib ki, ölkənin nüvə fəaliyyəti beynəlxalq nəzarət altındadır. O, uranın zənginləşdirilməsi ilə bağlı İranın mövqeyini “qanuni və hüquqlara əsaslanan” adlandırıb.

Bu açıqlama ABŞ və İran arasında nüvə danışıqlarının beşinci raundunun mayın 23-də Romada baş tutmasından sonra verilib.

“The Wall Street Journal” ın məlumatına görə, görüş razılaşmasız başa çatsa da, tərəflər danışıqları davam etdirmək barədə razılığa gəliblər.

ABŞ Prezidenti Donald Tramp danışıqlarla bağlı optimist fikirlər səsləndirərək bildirib: “Yaxın iki gündə sizə yaxşı və ya pis nəsə deyəcəyimi bilmirəm, amma hiss edirəm ki, sizə yaxşı bir şey söyləyəcəyəm. Biz real və ciddi irəliləyiş əldə etdik”.

Tramp həmçinin qeyd edib ki, İrana qarşı hərbi zərbədən yayınmaq üçün razılaşma əldə olunmasını istəyir.

Fidan Hacızadə
Sfera.az

"Amerikalı müfəttişlər İranın nüvə obyektlərin buraxıla bilər" – Eslami