Avropa Rusiyaya yeni sanksiyalar tətbiq edəcək - Sənəd hazırdır

Avropa liderləri Albaniyanın paytaxtı Tiranada keçiriləcək Avropa Siyasi Birliyinin sammitində Rusiyaya qarşı sanksiyaların sərtləşdirilməsi məsələsini gündəmə gətirəcəklər. 

Sfera.az xəbər verir ki, bu barədə “Politico” nəşri məlumat yayıb.

Görüş zamanı dövlət başçılarının Rusiya idxalına "cəza rüsumları"nın tətbiqi imkanlarını nəzərdən keçirəcəyi bildirilib. Sanksiyaların məqsədi Rusiyanın enerji və xammal ixracından əldə etdiyi gəlirlərin azaldılmasıdır.

Yeni sanksiya ideyası, ABŞ senatoru Lindsi Qremin təklifindən ilham alaraq formalaşdırılıb. Qeyd edək ki, Qrem Rusiya ilə bağlı atəşkəsə razılıq verilmədiyi halda ilkin və ikinci dərəcəli sanksiyaların tətbiqini nəzərdə tutan qanun layihəsi təqdim etmişdi. O, xüsusilə Rusiyadan neft, qaz, uran və digər strateji məhsullar idxal edən ölkələrə 500 faiz rüsum tətbiq olunmasını təklif edib.

Tiranada keçiriləcək qeyri-rəsmi sammitdə Fransa prezidenti Emmanuel Makron, Almaniya kansleri Fridrix Merz, eləcə də Türkiyə prezidenti Rəcəb Tayyib Ərdoğan və Böyük Britaniyanın baş naziri Key Starmerin iştirakı gözlənilir.

Hesabatda hansı ölkələrin konkret olaraq Rusiyaya qarşı tarif tətbiqi təşəbbüsünü dəstəklədiyi açıqlanmasa da, bu təşəbbüsün Avropada ciddi müzakirələrə səbəb olduğu bildirilir.

Fidan Hacızadə
Sfera.az