Yeni Zelandiya parlamentində keçirilən iclas zamanı “Haka” rəqsi edərək mübahisəli qanun layihəsinə etiraz edən üç deputata cəza verilməsi tövsiyə olunub.

Sfera.az xəbər verir ki, “The Guardian” qəzetinin yaydığı məlumata görə, bu hadisədə iştirak edən deputatlar, partiya liderləri Debbi Nqareva Paker və Raviri Vaititi, eləcə də parlamentin ən gənc üzvü Hana Ravhiti Maipi Klark yerli Maori qəbilələri ilə İngiltərə arasında 1840-cı ildə imzalanmış “Waitangi” müqaviləsinin yeni qanun layihəsi ilə radikal şəkildə yenidən şərh edilməsinə qarşı çıxıblar.

Aprel ayında qanun layihəsi gündəmdə olarkən Maipi Klark “Haka” rəqsi ifa etdiyi anda sənədin bir nüsxəsini cıraraq sosial mediada böyük səs-küyə səbəb olmuşdu. Hadisə parlamentin intizam komitəsinin diqqətini çəkib və nəticədə imtiyazlar komitəsi hər üç deputatın parlamentdən müvəqqəti uzaqlaşdırılmasını tövsiyə edib. Tövsiyəyə əsasən, Nqareva Paker və Vaititi üç həftə, Maipi Klark isə yeddi gün müddətində parlament iclaslarında iştirak edə bilməyəcəklər.

Komitənin hazırladığı hesabatda bildirilib ki, deputatların bu hərəkəti digər üzvlər üçün qorxu yarada biləcək xarakter daşıyır və parlamentə hörmətsizlik kimi qiymətləndirilir. Bildirilib ki, “Haka” rəqsi parlamentdə əvvəllər də ifa edilsə də, bu dəfə onun məqsədi və zamanlaması ciddi narahatlıq doğurub və qanunvericilik prosesinə mane olub.

Komitənin sədri Judit Collins açıqlamasında, tətbiq olunacaq cəzaların komitənin indiyə qədər verdiyi ən sərt qərarlar olduğunu qeyd edib. O, hadisəni “indiyə qədər şahidi olduqları ən pis davranış” kimi dəyərləndirib. Hesabatda həmçinin Nqareva Pakerin bir həmkarına silahla atəş açdığını iddia etməsi də pislənib. Deputat bu ifadəni rədd edərək, dediklərinin “wiri” adlı Maori mədəniyyətinə aid bir hərəkata istinad etdiyini bildirib.

Cəzaların təsdiqlənməsi üçün qərar, çərşənbə axşamı bütün deputatların iştirak edəcəyi səsvermə zamanı veriləcək. Qeyd edək ki, üç deputat parlamentdən uzaqlaşdırıldıqları müddətdə maaş almayacaq və növbəti həftə keçiriləcək büdcə müzakirələrində iştirak etməyəcəklər.

Bəsti Rəfizadə
Sfera.az

“Haka” rəqsi edən deputatlar cəzalandırıldı - "Bu ən sərt qərardır"