Argentina Ali Məhkəməsinin zirzəmisində 83 qutu nasist materialı tapılıb. Onların məqsədi II Dünya Müharibəsi zamanı Argentinada Adolf Hitlerin ideologiyasını yaymaq olub.

Sfera.az bildirir ki, versiyaya görə, 83 qutu sənəd faşist Almaniyasının Tokiodakı səfirliyindən 1941-ci ilin iyununda Yaponiyanın Nan-a-Maru paroxodunun göyərtəsində Argentinaya göndərilib.

Alman diplomatlarının qutularda yalnız şəxsi əşyalar olduğunu iddia etmələrinə baxmayaraq, Argentina gömrüyü onlardan beşini təsadüfi yoxlayıb. Orada faşist rejiminə aid vərəqələr, fotoşəkillər, təbliğat materialları və Nasist Partiyasına aid minlərlə dəftər tapılıb. Daha sonra federal hakim materialların müsadirə edilməsinə qərar verib və iş Ali Məhkəməyə göndərilib.

Bu materialların Argentinaya gəlməsinin səbəbləri və müsadirədən sonra Ali Məhkəmənin onlarla konkret olaraq nə etdiyi naməlum olaraq qalır. 84 il sonra məhkəmə işçiləri Ali Məhkəmənin muzeyi yaratmağa hazırlaşarkən təsadüfən qutulara rast gəliblər.

“Qutulardan birini açanda biz II Dünya Müharibəsi zamanı Argentinada Adolf Hitlerin ideologiyasını möhkəmləndirmək və yaymaq məqsədi daşıyan materiallar tapdıq” - məhkəmənin bəyanatında deyilir.

İndi tapılan bütün materiallar əlavə təhlükəsizlik tədbirləri ilə xüsusi otağa daşınıb. Ali Məhkəmə həmçinin Buenos-Ayresdəki Holokost Muzeyini aşkar edilmiş sənədlərin inventarlaşdırılması və mühafizəsi prosesinə qoşulmağa dəvət edib. Mütəxəssislər həmçinin Holokostla bağlı mümkün yeni məlumatlar, xüsusən də nasistlərin istifadə edə biləcəyi beynəlxalq maliyyə şəbəkələri ilə bağlı tapıntıları təhlil edəcəklər.

Qeyd edək ki, Argentina 1944-cü ilə qədər İkinci Dünya Müharibəsində bitərəf qalıb, 1945-ci ildə Almaniya və Yaponiyaya müharibə elan edib.

Holokost Muzeyinin məlumatına görə, 1933-1954-cü illər arasında 40.000-ə yaxın yəhudi Avropada nasistlərin təqibindən xilas olmaq üçün Argentinaya gəlib. Argentina hazırda Latın Amerikasında ən böyük yəhudi icmasına ev sahibliyi edir.

Aysel

Argentinada 83 qutu nasist materialı tapıldı - FOTOLAR