Tramp 3 milyard dollarlıq sərmayə qoyacaq
ABŞ Prezidenti Donald Trampın sahibi olduğu "Tramp Organization" şirkəti Qətərin paytaxtı Dohadan 40 kilometr şimalda yerləşəcək Simaisma bölgəsində 3 milyard dollarlıq lüks yaşayış layihəsinə sərmayə qoyacaq.
Sfera.az “Milliyet”nəşrinə istinadən xəbər verir ki, bu məqsədlə Tramp Organization-a bağlı “Dar Global” şirkəti ilə Qətərin aparıcı daşınmaz əmlak şirkətlərindən biri olan Qətər Diar arasında strateji əməkdaşlıq müqaviləsi imzalanıb.
Müqaviləyə əsasən, Simaisma bölgəsində “Tramp International Golf Club” və “Trump Villas” adlanan obyektlər inşa ediləcək. Təxminən 790 min kvadratmetrlik ərazini əhatə edəcək layihəyə 18 dəlikli beynəlxalq standartlara uyğun qolf meydançası, "Tramp Golf Club" binası və birbaşa çimərliyə çıxışı olan lüks villalar daxildir.
Rəsmi imzalanma mərasimi Qətər Diar-ın Lusail şəhərindəki qərargahında keçirilib. Tədbirdə Qətərin bələdiyyələr naziri və Qətər Diar-ın sədri Abdullah bin Həməd bin Abdullah Əl Attiya, ABŞ Prezidenti Donald Trampın oğlu və Tramp Organization-ın sədr müavini Erik Tramp, həmçinin hər iki şirkətin yüksək səviyyəli rəhbərləri iştirak ediblər.
Protokolu Qatar Diar-ın baş direktoru Əli Məhəmməd Əl-Əli və “Dar Global”ın baş direktoru Ziad Əl Çaar imzalayıb. Layihənin Qətərin lüks daşınmaz əmlak sektoruna yeni nəfəs gətirməsi və ölkənin turizm potensialına töhfə verməsi gözlənilir.
Fidan Hacızadə
