Tramp Kanadanı ABŞ-yə qoşulmağa dəvət edib
ABŞ-nin yeni seçilmiş prezidenti Donald Tramp Kanadanın Baş naziri Castin Trüdonun istefası fonunda Kanadanın ABŞ-yə 51-ci ştat kimi qoşulmasını yenidən təklif edib.
Sfera.az xəbər verir ki, təxminən 10 il Kanadanın baş naziri vəzifəsində çalışmış Trüdo bazar ertəsi istefa qərarını açıqlayıb. Lakin o, Liberal Partiyasının yeni lideri seçilənə qədər vəzifəsində qalacaq. Tramp Kanada baş nazirinin qərarını şərh edib.
"ABŞ Kanadanı ayaqda saxlayan böyük ticarət kəsirlərinə və subsidiyalara daha dözə bilməz. Castin Trüdo bunu başa düşdü və buna görə də istefa verdi", - Tramp Truth sosial şəbəkəsində yazıb.
Onun sözlərinə görə, Birləşmiş Ştatlarla birləşmə Kanadaya vergi endirimləri, “Rusiya və Çin gəmilərindən gələn təhdidlərdən” təhlükəsizlik zəmanəti verəcək və həmçinin ticarət tariflərini ləğv edəcək.
ABŞ-nin seçilmiş liderinin sözlərinə görə, Kanadada çoxları ABŞ-nin 51-ci ştatı olmaq ideyasını bəyənirlər.
"Birlikdə böyük bir millət olardıq!" - Tramp deyib.
Trüdonun istefasından əvvəl reytinqi 17,4%-ə düşüb. Onun rəhbərlik etdiyi Kanada Liberal Partiyasına dəstək 21,3%, onun əsas rəqibi olan Kanada Mühafizəkarlar Partiyasına isə respondentlərin 47%-i etibar edir. Seçicilərin 40%-i səsini Mühafizəkarların lideri Pierre Poilvert-ə verməyə hazırdır.
İnci
