Şimali və Cənubi Koreya arasında GƏRGİNLİK: Kim Çen Inın bacısından ƏMR - FOTO

Şimali və Cənubi Koreya arasında qeyri-adi davranış səbəbindən gərginlik yaranıb.

Sfera.az xarici mediaya istinadən xəbər verir ki, sərhəddə səsgücləndiricilər vasitəsilə təbliğat apardığına görə Cənubi Koreya Şimali Koreyanın “zibil” balonlarının hücumuna məruz qalıb.

Cənubi Koreya ordusunun Baş Qərargahının sözçüsü polkovnik Li Sonq Cunun açıqlamasına görə, Şimali Koreya onun ölkəsinə doğru daha 310 ədəd “zibil” balonları göndərib. Li, bu şarların çoxunun külək səbəbindən Cənubi Koreyaya çatmadığını qeyd edib. Balonların içərisində kağız və plastik olduğunu bildirən Li, heç bir zəhərli maddə aşkar edilmədiyini deyib.

Şimali Koreya Mərkəzi Xəbər Agentliyinin (KCNA) verdiyi məlumata görə, ölkə lideri Kim Çen Inın bacısı Kim Yo-jonqun əmri ilə cənub tərəfinin sərhəddə apardığı təbliğat işlərinə cavab olaraq bu cür addım atıblar. Şimali Koreya tərəfi balonların daşıdığı yükün zibil yox, təbliğat materialları olduğunu bildirib.

Qeyd edək ki, burada “zibil balon” ifadəsini Cənubi Koreya tərəfi işlədir. Cənublular hesab edir ki, şimaldan göndərilənlər təbliğat vasitəsi yox, zibildir.

Xatırladaq ki, təbliğat məqsədilə balonlardan ilk dəfə Cənubi Koreya istifadə edib. Bu ilin mayın 13-də Şimali Koreyaya Pxenyan administrasiyası əleyhinə təbliğat vərəqələri olan təxminən 20 böyük şar göndərilib. Daha sonra Şimali Koreya cavab tədbiri kimi mayın 29-da içində “zibil” olan 150-dən çox şar göndərib. İyunun 2-də isə Cənubi Koreya tərəfi Şimali Koreyanın daha 720 ədəd içində “zibil” olan 720 şar göndərdiyini bildirib.

Vasif