251 santimetr boya malik Türkiyəli Sultan Kösen bu günlərdə dünyanın ən uzun adamı adına layiq görülməsinin növbəti ildönümünü qeyd edib. O, məşhur şounun çəkilişlərində iştirak etmək üçün İtaliyaya uçub. Bu barədə Ginnesin Rekordlar Kitabı öz saytında məlumat paylaşıb.

Sfera.az bildirir ki, Sultan Kösen dünyanın ən hündür adamı hesab olunur. O, ilk dəfə 2009-cu ildə Ginnesin Rekordlar Kitabına düşüb. Həmin vaxt onun boyu 246,5 sm olub.

42 yaşlı Sultanın genetik xəstəliklə doğulduğu bildirilir. 10 yaşından etibarən böyümə hormonunun hipersekresiyası səbəbindən boyu sürətlə artmağa başlayıb. Bu da sağlamlıq problemlərinə, xüsusən də oynaq ağrıları və sümük deformasiyasına səbəb olub.

Mütəxəssislər onun əllərinin qeyri-normal ölçüsünü də qeydə alıblar - biləyindən orta barmağın ucuna qədər 27,5 sm-dir.

Ginnesin Rekordlar Kitabı

İki il sonra, 2011-ci ildə Sultanın yenidən boyu ölçülərkən məlum olub ki, o, 251 sm-dir, qollarının uzunluğu isə 28,5 sm artıb.Bu rəqəmlər hələ də mütləq rekord hesab olunur.

Daim boyunun artması gündəlik həyatını çətinləşdirsə də, o, təslim olmur və hətta dünyanın 120 ölkəsini ziyarət etməyi bacarıb.

İtaliyada çəkilişlər zamanı Kösen pərəstişkarları ilə görüşməyin sevincini yaşayıb. O, özünəməxsus ölçülərini nümayiş etdirib. Kösen şirniyyatları çox sevdiyini etiraf edir.

Bundan əlavə, Kösen dəfələrlə elmi araşdırma obyektinə çevrilmişdir. Alimlər gigantizmin və əlaqəli xəstəliklərin inkişaf mexanizmlərini daha yaxşı tədqiq etmək üçün onun vəziyyətini öyrənirlər.

Fiziki məhdudiyyətlərinə baxmayaraq, Türkiyənin bu bənzərsiz sakini nikbinliyi və dönməz ruhu ilə milyonlarla insanı ruhlandırmaqda davam edir.

Yeri gəlmişkən, Sultan dünyanın ən uzun qadını Rumeisa Gelgidən 36 sm hündürdür. Buna görə də hələ ki, planetin ən uzun insanı Sultan Kösen hesab olunur.

Aysel

Sfera.az

Planetin ən hündür adamı - Dünyanın 120 ölkəsini gəzib