Bu qidalar xəstəlik mənbəyi imiş - XƏBƏRDARLIQ

Son illərdə sağlam həyat tərzinə üstünlük verənlərin tez-tez seçdiyi bəzi qidaların əslində orqanizmə zərər verə biləcəyi məlum olub. 

Sfera.az xəbər verir ki, mütəxəssislərin fikrincə, heyvan ətinə alternativ olaraq bitkilərdən hazırlanmış qidalar, tərkibində qlüten olmayan qəlyanaltılar və düyüdən hazırlanmış tortabənzər məhsullar sağlamlıq üçün düşündüyümüz qədər faydalı deyil.

Araşdırmalara görə, bu qidalar yaşlanma prosesini sürətləndirə, dərinin keyfiyyətini zəiflədə və orqanizmdə iltihabi proseslərə səbəb ola bilər. Xüsusilə, süni bitki mənşəli ət məhsullarının tərkibində zərərli yağlar, duz və süni əlavələr yüksək səviyyədə olur. Bu isə yüksək qan təzyiqi, insult riski, dəridə şişkinlik və solğunluq kimi mənfi təsirlərlə nəticələnə bilər.

Mütəxəssislər vurğulayırlar ki, bir məhsulun üzərində “bitki mənşəli”və ya “qlütensiz” yazılması onun sağlam olduğu anlamına gəlmir. Onların fikrincə, istehlakçılar məhsul etiketlərini diqqətlə oxumalı, tərkibindəki maddələrə xüsusi diqqət yetirməlidirlər.

Sağlam qida adı ilə geniş istifadə olunan, lakin diqqətlə yanaşılması tövsiyə edilən məhsullar sırasında buğda çörəkləri, granola məhsulları, düyüdən hazırlanmış və qlütensiz qəlyanaltılar yer alır. Mütəxəssislər bildirirlər ki, bu məhsulların bəzilərində gizli şəkər və zərərli karbohidratlar yüksək səviyyədə olur ki, bu da qlikasiya prosesini sürətləndirərək kollagenin quruluşunu pozur. Nəticədə dəridə sallanma və qırışlar yaranır, erkən yaşlanma əlamətləri müşahidə olunur.
Belə ki, emal olunmuş qidaları qidalanmasından çıxaran şəxslərin çəkilərini daha asan idarə etdikləri və aclıq hissinin azaldığı müəyyən olunub.

Fidan Hacızadə
Sfera.az