"Nömrə başqasınındır, cərimə mənə gəlib" - Radarlar hərfləri qarışdırır? - DİN rəsmisindən AÇIQLAMA
Samir Quliyev adlı şəxs sosial media səhifəsindəki paylaşımında maraqlı bir iddia ilə çıxış edib. O qeyd edib ki, başqa avtomobilə aid olan cərimə bir hərf səhvinə görə ona göndərilib.
Sfera.az adıçəkilən şəxsin paylaşımına istinadən xəbər verir ki, radarlar dövlət qeydiyyat nişanındakı hərf seriyasındakı “O” və “Q” hərflərini qarışdırıb.
“Dövlət qeydiyyat nişanı “FO” olan qara rəngli “Hyundai” avtomobilim var”, - deyən şikayətçi bildirib ki, ona göndərilən məlumatda dövlət qeydiyyat nişanındakı hərf seriyası “FQ” formasında olub, cərimə sənədinə əlavə edilən fotoda isə “Hyundai” yox, BMW markalı avtobilin şəkli əlavə edilib.
Üzləşdiyi məsələ ilə bağlı Dövlət Yol Polisi İdarəsinə aid olan 902 nömrəli Qaynar xəttə zəng etdiyini deyən S.Əliyev, həmin nömrə ilə əlaqə saxlaya bilmədiyini, cərimənin hələ də ləğv edilmədiyini iddia edib.
Qeyd edək ki, son vaxtlar texniki səhv ucbatından cərimələrin düzgün təyin edilməməsi ilə bağlı çoxlu şikayətlərə rast gəlinir. Bununla bağlı sosial şəbəkələrdə də paylaşımlar qarşımıza çıxır.
Xüsusən, nömrələrdə “Q” seriyası istifadə ediləndən sonra bu cür texniki səhvlərin sayının artdığı iddia olunur.
İddialara görə, radarlar bəzən “O” hərfi ilə “Q” hərfini fərqləndirə bilmir. Bu kimi hallardan avtomobil sahibləri və ya sürücülər əziyyət çəkirlər. Həmin şəxslər ona aid olmayan problemlərlə məşğul olmağa başlayır, lüzumsuz yerə vaxt itkisi ilə üzləşirlər.
Məsələ ilə bağlı Dövlət Yol Polisi İdarəsindən bildirdilər ki, radarların hərfləri qarışdırılması ilə bağlı iddialar əsassızdır. Qurumdan bunun adi texniki xəta olduğu söylənildi.
Baş Dövlət Yol Polisi İdarəsinin inspektoru, polis leytenantı Elvin Hacıyev saytımıza açıqlamasında qeyd etdi ki, sözügedən nəqliyyat vasitəsinin sürücüsü tərəfindən yol verilən qayda pozuntusu foto və video qeydiyyat funksiyasına malik xüsusi texniki vasitə ilə aşkar edilərkən, texniki xəta səbəbindən şəxs barəsində yalnız elektron qərar çıxarılıb.
E.Hacıyev məsələnin araşdırıldığını və texniki xətanın aradan qaldırıldığını vurğuladı.
Altay
