Məktəblərin sayı nə üçün azalıb?- AÇIQLAMA

Azərbaycanda ümumi təhsil müəssisələrinin sayında azalma var. Təhsil müəssisələrinin sayı 2022-ci ildə 4 min 383 ədəd olduğu halda 2023 cü ildə 4 min 372, 2024-cü ildə 4 min 307-ə düşüb.

Cəmi iki ildə təhsil müəssisələrinin sayı 76 ədəd azalıb. 

Maraqlıdır, məktəblərin sayının azalması nə ilə bağlıdır və növbəti illərdə də azalma davam edə bilərmi?

Mövzu ilə bağlı Sfera.az-a açıqlama verən təhsil eksperti Elçin Əfəndi bildirib ki, təhsil müəssisələrinin müvafiq olaraq azalması yaxın dövrdə Elm və Təhsil Nazirliyi tərəfindən təhsil müəssisələrini  optimallaşdırılması və rasionallaşdırılması ilə bağlıdır. 

Onun sözlərinə görə, burada başlıca məqsəd şagird sayı az olan təhsil müəssisələrinin bağlanılması, əvəzində şagirdlərin başqa bir təhsil müəssisəsinə köçürülməsidir:

“Elə təhsil müəssisəsi var ki, orada cəmi 10-20 şagird təhsil alır, hər bir sinifdə 3-5 şagird əyləşir. Şagird sayı az olanda isə bəzən dərslər boş keçir, təhsilverənlər də pozitiv olmur, bəziləri dərsdən yayınır. Belə olduğu təqdirdə dövlət büdcəsindən kifayət qədər maliyyə itkisi baş verir. Bunun əvəzində isə şagirdlər yaxın ərazidəki 500-dən çox şagird sayı olan təhsil müəssisələrinə daşınırlar. Bu proses zamanı nazirlik tərəfindən uzaq məsafələrə servislər də təşkil olunur. Prinsip etibarilə belə qərarın alınması onu deməyə əsas verir ki, artıq dövlət büdcəsindən ayrılan maliyyə boşuna xərclənmir. Şagirdlər də daha böyük kollektivdə təhsil alır, düzgün əlaqələrin qurulması təmin edilir, sosiallaşa mühitdə formalaşa bilirlər, beləliklə rəqabətə meyilli olurlar”. 

Mütəxəssisin fikrincə, bu prosesin növbəti illərdə də davam edəcəyi gözlənilir.

Firuzə Əliyeva
Sfera.az