ABŞ Xarici İşlər Nazirliyi tələbə vizası üçün müraciət edən əcnəbilərlə bağlı yeni tələblər irəli sürüb. Artıq bu vizaya müraciət edən şəxslər sosial media hesablarını ictimai şəkildə açıq saxlamalıdırlar.

Sfera.az-ın “NTV”yə istinadən xəbər verir ki, “Politico” xəbər saytının əldə etdiyi rəsmi sənədlərə əsasən, əvvəlki dövrdə dayandırılmış tələbə vizası müraciətləri yenidən qəbul olunur. Lakin bu dəfə yeni şərt tətbiq edilib - namizədlər sosial media fəaliyyətlərini gizlətməməlidirlər.

ABŞ səfirlik və konsulluqlarına göndərilən təlimatda diplomatlara müraciət edən şəxslərin sosial media paylaşımlarını diqqətlə araşdırmaq tapşırılıb. Xüsusilə ABŞ vətəndaşlarına, mədəniyyətinə, hökumətinə və prinsiplərinə qarşı düşmən mövqedə olub-olmamaq əsas diqqət nöqtəsidir.

Bundan əlavə, konsulluqlardan siyasi fəallıq keçmişi olan şəxslərin müəyyənləşdirilməsi, onların ABŞ-da oxuyarkən bu fəaliyyətləri davam etdirmə ehtimalının dəyərləndirilməsi tələb olunur. Vizaya müraciət edən şəxslərin ABŞ üçün potensial təhlükə olub-olmaması, HƏMAS təşkilatı ilə mümkün əlaqələri və antisemit davranışlara yol verib-vermədikləri də qiymətləndiriləcək.

Nazirlik bununla kifayətlənməyərək, "çevrim içi varlıq" anlayışını təkcə sosial mediaya deyil, “LexisNexis” kimi hüquqi və kommersiya xarakterli məlumat bazalarına da şamil edir.

Qeyd edək ki, may ayında ABŞ dövlət katibi Marko Rubio bütün səfirlik və konsulluqlara tələbə vizası üzrə yeni görüş tarixlərini təxirə salmaq barədə göstəriş vermişdi. Bu qərar sosial media məlumatlarının kifayət qədər toplanmaması ilə əsaslandırılıb.

Bəsti Rəfizadə
Sfera.az

ABŞ-nin yeni viza qaydaları: Sosial media hesabı açıq olmalıdır