Dərsliklər niyə səhvlərlə zəngindir? – “Bunun tək günahkarı Təhsil Nazirliyidir”

Bu sözləri Sfera.az-a açıqlamasında VI sinif tarix dərsliyində 56 qüsur və səhvin aşkarlanmasına münasibət bildirərkən təhsil eksperti Kamran Əsədov deyib:

 

"Yarımçıq hamiləlikdən dünyaya gələn uşaq xəstə olur. Onu nə qədər müalicə etsən də, o sağalmayacaq.  Azərbaycanda da dərslik siyasəti yarımçıq dünyaya gələn uşağı xatırladır. Təhsil Nazirliyinin tender elan etməsindən, dərsliyin çap olunmasına qədər olan müddət cəmi 6 ay olur.  Müddət azlığından, müəlliflər heyəti tərəfindən dərsliyin yazılması,  yoxlanılması, tenderə verilməsi prosesi sürətlə aparılır. Digər tərəfdən dərsliyi yoxlayan ekspertlərin bilik, bacarıq və savadının dərslik müəlliflərindən çox olmaması səbəbindən dərsliklərdə bu kimi qüsurlar ortaya çıxır”.

Həmsöhbətimiz düşünür ki, Təhsil Nazirliyi dərslik siyasətində öz öhdəliyini yerinə yetirə bilmir: "Dərsliyi yoxlayan ekspertlər qeyri-professional və qeyri-şəffaf şəkildə seçilir.  Nazirlik tender elan edir. Tenderə də azı 3 dərslik komplekti qəbul edilir.  Qalib gələn də, tenderə qoşulan bu 3 dərslikdən ən yaxşısıdır. Ən yaxşısı budursa, Allah pisindən saxlasın.

Dərsliklər tenderə daxil ediləndə, hətta keçid balı toplamayan, amma tenderdəki dərsliklər arasında ən çox bal toplayan dərslik qalib kimi müsabiqədən keçmiş elan edilir. Bu ən ciddi yanlışdır. VI sinif tarix dərsliyində müəyyən edilən 56 qüsur, heç də dərsliyin sıradan çıxarılmasına səbəb olacaq dəyişikliklər deyil. Amma bu o demək deyil ki, Təhsil Nazirliyi işinə səhlənkar yanaşmalı və yaranan qüsurları da ondan sonrakılar düzəltməlidir”.