İran diplomatik etikanı gözləmir - Hikmət Babaoğlu
İranın Azərbaycanla bağlı manipulyativ açıqlamalarına daha biri əlavə olunub. Rəsmi Tehran iddia edir ki, Azərbaycanda saxlanılan iranlı məhbuslara qarşı normal davranılmır, onların bəziləri əsassız yerə saxlanılıb.
İranın bu cür açıqlamalar verməsinə münasibət bildirən deputat Hikmət Babaoğlu Sfera.az-a bildirdi ki, İranın Azərbaycana münasibətdə beynəlxalq hüquqa və diplomatik normalara uyğun davranmaması artıq adi hal alıb.
Onun sözlərinə görə, İranın xüsusilə Azərbaycanla və onun daxili məsələləri ilə bağlı verdiyi bəyanatların əksəriyyəti ölkənin dövlət imicinə zərbə vurmaq məqsədi daşıyır:
“Bu bəyanatlar eyni zamanda İranda yaşayan azərbaycanlıların gözündə Azərbaycan dövlətinə qarşı mənfi rəy formalaşdırmaq məqsədi daşıyır. Bu isə olduqca etikadan uzaq, qeyri-peşəkar və zərərli diplomatik yanaşmadır”.
Deputat İran tərəfinin Azərbaycanın həbsxanalarında saxlanılan İran vətəndaşları ilə bağlı səsləndirdiyi fikirləri isə əsassız, qeyri-ciddi və heç bir yaxşı niyyətə xidmət etməyən bəyanatlar kimi dəyərləndirib. H. Babaoğlu vurğulayıb ki, Azərbaycan dövləti hər zaman törətdikləri əmələ görə məhkum olunmuş şəxslərə qarşı humanist mövqe nümayiş etdirib. O, dəfələrlə Azərbaycan Prezidenti tərəfindən əfv olunmuş xarici vətəndaşların, o cümlədən İran və Pakistan vətəndaşlarının azadlığa buraxılması mərasimlərində iştirak etdiyini bildirib:
“İnsan Hüquqları Komitəsinin üzvü kimi bu proseslərdə iştirak etmişəm və həmin şəxslərin Azərbaycan dövlətinə və rəhbərliyinə minnətdarlıqla yanaşdıqlarının şahidi olmuşam”.
Həmçinin o əlavə edib ki, Azərbaycanın həbsxanalarında guya qanunsuzluqların baş verdiyi ilə bağlı yayılan fikirlər həqiqəti əks etdirmir və məqsədli şəkildə manipulyasiya xarakteri daşıyır. Onun sözlərinə görə, əslində reallıqda tam əksi müşahidə olunur:
“İranda haqlı və ya haqsız şəkildə həbs edilən Azərbaycan vətəndaşlarına qarşı baş verən hüquq pozuntuları, məhkəməsiz saxlanılmalar, işgəncə halları və digər qanunsuz təzyiqlər kifayət qədər sənədləşdirilib. İranın xüsusi xidmət orqanları bəzi azərbaycanlıları öz ölkələri əleyhinə casusluğa cəlb etməyə çalışıb və bu zaman işgəncələr tətbiq olunub. İran bu halları gizlətməyə çalışır və əksinə, bütün məsuliyyəti Azərbaycanın üzərinə atmağa çalışır. Lakin İran azərbaycanlıları da yaxşı bilirlər ki, Azərbaycan dövləti humanist və hüquqa əsaslanan siyasət yürüdür”.
Bəsti Rəfizadə
Sfera.az
