Rusiya və Ukrayna arasında danışıqların üçüncü raundunun da İstanbulda baş tutacağı gözlənilir.

Maraqlıdır, yenidən İstanbulun seçilməsi nəyə işarə edir? Yekun sülh buradamı əldə olunacaq?

Sfera.az-a mövcud suallarla bağlı açıqlama verən politoloq Elçin Xalidbəyli Rusiya və Ukrayna arasında aparılan danışıqlar üçün İstanbulun seçilməsinin heç də təsadüfi olmadığını deyib.

Müsahibimiz bildirib ki, hazırkı şəraitdə Moskvanın danışıqlar aparmaq üçün üz tuta biləcəyi ölkələrin sayı olduqca məhduddur və bu siyahıda ən önəmli məkan məhz İstanbul hesab olunur:

“Rusiya hazırda dünya ilə geniş miqyaslı qarşıdurma içindədir və yalnız bir neçə ölkə ilə normal diplomatik münasibətlərini qoruyub saxlayır. Bu dövlətlərin başında isə Türkiyə gəlir. Məhz buna görə də Moskvanın təşəbbüsü ilə görüşlərin İstanbulda keçirilməsi qərara alınıb. Lakin bu danışıqlar prosesinin uğurla nəticələnəcəyi inandırıcı görünmür. Çünki Moskva elə tələblər irəli sürür ki, əgər bu şərtlər sülh razılaşmasına daxil edilərsə, həmin sənəd Ukrayna üçün faktiki olaraq təslim aktına çevrilə bilər. Bu baxımdan Rusiya üçün olduqca çətin və həssas dövr yaşanır”.

Politoloq hazırda beynəlxalq ictimaiyyət və Ukraynanın tərəfdaşlarının Moskvanı ciddi zərbələrlə geri çəkilməyə məcbur etdiyini qeyd edib:

“Bununla yanaşı irəli sürdüyü maksimalist şərtlərdən imtina etməyə və danışıqlar masasında daha konstruktiv mövqe tutmağa vadar etməyə çalışırlar. Görünən odur ki, bu proses hələ bir müddət davam edəcək. Ancaq Kreml mövcud siyasətini və qeyri-real tələblərini davam etdirdikcə, yaxın gələcəkdə sülh razılaşmasının imzalanması ehtimalı olduqca zəif görünür”.

Fidan Hacızadə
Sfera.az

"Rusiyanın son seçimi Türkiyədir" - Sülh İstanbulda olacaq?