Ermənistanda gərginlik artır, Rusiya niyə narahatdır? - AÇIQLAMA

Rusiya müdafiə naziri Andrey Belousov bildirib ki, Ermənistanın Sünik vilayəti  ətrafında gərginlik davam edir. Eyni zamanda, Cənubi Qafqazda xarici ölkələrin fəallığı artır.

Sfera.az xəbər verir ki, mövzu ilə bağlı danışan politoloq Elxan Şahinoğlunun fikrincə, bu sözlər İrəvana və Parisə ünvanlanıb. 

Politoloq qeyd edib ki, Fransa bir neçə gündən sonra Qərbi Zəngəzurda konsulluq açacaq:

"Ayrıca  Gorusda Ermənistan-Fransa konfransı keçiriləcək. Rusiya müdafiə nazirinin sözlərinə görə, hazırkı fəallığın məqsədi təhlükəsizliyin gücləndirilməsi yox, həmin ölkələrin təsir dairəsini genişləndirməkdir. Yəni Belousov demək istəyib ki, Fransanın dərdi Ermənistanın təhlükəsizliyi deyil, bölgədə təsir dairəsini genişləndirməkdir. Fransa Azərbaycanla münasibətləri normallaşdırmadan yalnız Qərbi Zəngəzurda konsulluq açmaqla Cənubi Qafqazda möhkəmlənə bilməyəcək". 

E.Şahinoğlu vurğulayıb ki, Belousovun narahatlığı anlaşılandır:

"Kreml hesab edir ki, Fransanın Ermənistandakı fəallığının əsas məqsədi Rusiyanı bu ölkədən sıxışdırıb çıxarmaqdır. Buna görə də Rusiya Türkiyə və İranın xaricində bölgədən uzaq ölkələrin Cənubi Qafqazda fəallığının əleyhinədir".

Firuzə Əliyeva
Sfera.az