Ukrayna silahlı qüvvələri son bir neçə gündür ki, cəbhədə atəşkəs rejiminə əməl edir. Bunun hansı səbəbdən olduğu açıqlanmasa da hərbi mənbələr atəşkəs göstərişinin yuxarıdan gəldiyini bildirirlər.

Rəsmi Kiyevin belə bir qərar qəbul etməsini bəzi dairələr sülh danışıqlarına hazırlıq kimi şərh edir.

Sfera.az-a açıqlama verən politoloq Elçin Xalidbəyli bu atəşkəsin Kiyev üçün strateji əhəmiyyətini və onun Qərblə olan əlaqələrini şərh edərkən maraqlı bir neçə məqamı vurğulayıb.

Xalidbəyli bildirib ki, ABŞ və Kiyev arasında artan dialoq, daha məhsuldar və pozitiv bir atmosferin formalaşmasına səbəb olub. “ABŞ-nin Ukrayna ilə anlaşmış kimi görünməsi, həmçinin Ağ Evlə Kiyev arasında daha sıx əməkdaşlığın mövcud olduğu müşahidə edilir. Bu baxımdan, rəsmi Kiyev atəşkəs təklifinə əməl etməklə, Rusiyanı beynəlxalq məkanda daha da çətin vəziyyətə salmaq niyyəti güdür”, – deyə ekspert qeyd edib.

Ekspert atəşkəsin Ukraynanın sülh danışıqları üçün hazırlığı kimi şərh edilməməli olduğunu da bildirdidi. Onun fikrincə, rəsmi Kiyev, beynəlxalq ictimaiyyəti və Qərb dövlətlərini inandırmaq istəyir ki, müharibənin davamı üçün məsuliyyət daşıyan tərəf Rusiyadır:

“Ukrayna beynəlxalq ictimaiyyətin və Qərb dövlətlərinin qənaətlərini möhkəmləndirmək üçün bu təklifi dəstəkləyir. Rəsmi Kiyev Ukraynanın bu müharibədə günahkar olmadığını bir daha sübut etməyi və bu günahı tamamilə Rusiyanın üzərinə yıxmağı hədəfləyir”.

Bundan başqa E.Xalidbəyli bildirib ki, ABŞ və Qərb artıq Rusiyanın müharibə cinayətləri və mülki əraziləri hədəf alması məsələlərini daha ciddi şəkildə izləyir:

"Tramp və onun administrasiyasına daxil olan bəzi yünsək ranqlı şəxslər Ukrayna müharibəsinin davam etməsinin qarşısında duran ən böyük əngəlin Putin olduğunu vurğulamışdılar. Bu da ABŞ-nin artıq Rusiyaya qarşı daha sərt mövqe sərgiləmək və müharibə prosesinə dair məsuliyyəti Rusiya üzərinə atmaq niyyətində olduğunu göstərir”.

Politoloq həmçinin əlavə edib ki, əgər bu tendensiya davam edərsə, ABŞ və kollektiv Qərb Ukraynaya hərbi dəstəyi bərpa edəcək və Rusiyaya qarşı yeni sanksiyalar tətbiq edəcəklər. “Rusiyanın, xüsusilə də yaşayış ərazilərinə qarşı hücumları beynəlxalq ictimaiyyətdə daha çox qınanır və bu, ABŞ-nin siyasətini dəyişməyə gətirib çıxarır”, – deyə ekspert vurğulayıb:

"Nəticə etibarilə, rəsmi Kiyev, atəşkəs təklifinə əməl etməklə yalnız müharibəni dayandırmağa deyil, həm də beynəlxalq aləmdə Rusiyanın müharibəyə davam etməsinin yanlış olduğunu daha qəti şəkildə ortaya qoymağa çalışır”.

Bəsti Rəfizadə
Sfera.az

ABŞ-nin Rusiya ilə bağlı siyasəti dəyişir: "Moskva daha çətin vəziyyətə düşəcək”