“İrsimizə Hörmətlə” layihəsinin təqdimatı baş tutdu – FOTO
Azərbaycan Respublikası Mədəniyyət Nazirliyinin maliyyə dəstəyi ilə “Mədəniyyət Könüllüləri” İctimai Birliyi tərəfindən hazırlanan “İrsimizə Hörmətlə” layihəsinin təqdimatı baş tutub.
Sfera.az xəbər verir ki, “İrsimizə Hörmətlə” layihəsi çərçivəsində irsimiz.az internet portalı geniş tamaşaçı auditoriyasına təqdim edilib.
Layihənin məqsədi milli ornamentlərin tarixini, mənalarını və əhəmiyyətini geniş ictimaiyyətə çatdırmaq, xüsusilə gənc nəslin milli mədəniyyətə marağını artırmaq və bu ornamentləri gələcək nəsillərə ötürməkdir. Bu platforma, Azərbaycanın zəngin mədəni irsinin bir hissəsi olan ornamentləri tanımağa, qorumağa və gələcək nəsillərə təqdim etməyə xidmət edir. Eyni zamanda mədəni irsimizi təbliğ edərək, həm yerli, həm də beynəlxalq səviyyədə daha geniş kütləyə çatdırılmasına töhfə verir.
Portalda ornamentlərin tarixi ilə bərabər onların geyimlərdə, aksesuarlarda, keramikada və xalçalarda necə yaşadığı, müasir dövrə necə uyğunlaşdığı əks olunub. Eyni zamanda müxtəlif milli brendlərin kolleksiyalarından nümunələr yer alıb.
Tədbirdə Azərbaycan Respublikasının Əməkdar incəsənət xadimi, sənətşünaslıq üzrə elmlər doktoru, professor Kübra Əliyeva, Azərbaycan Milli Geyim Mərkəzinin rəhbəri, sənətşünaslıq üzrə fəlsəfə doktoru, "Cizgi" brendinin yaradıcısı dizayner Gülnarə Xəlilova, "Rəsm" brendinin təsisçisi və dizayneri Rəsminə Qürbətova, "Gilabi Ceramics" brendinin təsisçisi və rəhbəri, sənətşünaslıq üzrə fəlsəfə doktoru, dosent Emin Ələkbərov, xalçaçı dizayner Elnarə Rəsulova, xalçaçı rəssam Fəxriyə Hacıyeva çıxış edərək ornamentlərin dövrümüzdəki rolu haqqında öz fikirlərini çatdırıblar. Daha sonra “Mədəniyyət Könüllüləri” İctimai Birliyinin sədri, sənətşünaslıq üzrə fəlsəfə doktoru Ülviyyə Bəbirli irsimiz.az portalının etibarlı mənbə olduğunu qeyd edərək təqdim edib.
"İrsimizə Hörmətlə" layihəsi çərçivəsində yaranan bu internet portalı, Azərbaycanın bənzərsiz ornament tarixini və onun müasir dünyada necə yaşadığını göstərməyi hədəfləyir.
