Türkiyə “banan respublikası” deyil, bu ölkədə hakimiyyətə küçədən gəlmək olmaz.

Sfera.az xəbər verir ki, bunu REAL partiyasının sədri Natiq Cəfərli deyib.

Onun sözlərinə görə, Türkiyədə siyasi institutlar işləkdir, siyasi partiyalar güclüdür, media azadlığı var, cəmiyyət diridir, siyasiləşmiş vətəndaşlar, ideoloji qruplar var:

"Müxalifətin indiki durumda ən çox israr etdiyi məsələ erkən seçkilər ola bilər, AKP isə erkən seçkilərə yaxın 2 ildə getmək istəmir, buna dirənəcək. Türkiyədə hakimiyyət ancaq “sandıqla” dəyişə bilər, belə də olacaq. İndi söhbət ondan gedir ki, əgər yaxın 2 ildə seçki olmayacaqsa, İmamoğlunun reytinqini indiki kimi yüksək saxlamaq mümkün olacaqmı, yoxsa AKP-nin sübutlarla, bəzən isə uydurmalarla onu etibarsızlaşdıra biləcəkmi. AKP ona görə indi hərəkətə keçdi ki, seçkiyə bir neçə ay qalmış əsas namizədə qarşı atılan addımlar onu birbaşa hakimiyyətə daşımaq olardı, amma indi, təxminən, 2 illəri var ki, həm İmamoğlunun reytiniqi sala, həm də müxalifət daxilində oyunlar qura bilsinlər.

Bir şeyi də unutmayaq ki istənilən ölkədə, hətta ən demokratik ölkələrdə belə, iqtidarların həmişə ciddi üstünlükləri olur, bu üstünlükləri anlamaq üçün isə zaman lazımdır. Əgər AKP bu zaman kəsimində, məsələn, “kürd məsələsini”, terroru bitirə bilsə, ciddi üstünlük qazanacaq, iqtisadiyyatda düzəlmə yaşansa, dəstək əldə edəcək. Yeri gəlmişkən, indiki durumda ən obyektiv indikatorlardan biri iqtisadiyyat olacaq – bu gün artıq birja az da olsa, yüksəlir, dollar sabitləşib, əgər səhm və valyuta bazarında sabitliyi yarada bilsələr, bu da AKP üçün üstünlük yaradan faktora çevrilə bilər".

N.Cəfərli qeyd edib ki, əgər müxalifət düzgün davrana bilsə, daxildən xainliklərlə üzləşməsə, parçalanmalar olmasa, 2 ildə reytinqi yüksək saxlamaq və növbəti seçkilərdə qalib gəlmək olar.

Ekspert sonda vurğulayıb ki, hakimiyyətə kimin gəlməsindən asılı olmayaraq, Azərbaycanla münasibətləri dəyişməyəcək:

"Əminəm ki, hər iki ölkədə hakimiyyətdə kimin və ya kimlərin olmasından asılı olmayaraq, müttəfiqliyimiz, ittifaqımız davam edəcək, hətta, daha da güclənəcək. Çünki dünyada nadir görünən orqanik, hədəflərin üst-üstə düşdüyü bir ittifaq var – hər iki qardaş ölkənin gələcəyi bu müttəfiqliyin möhkəmlənməsini diktə edir".

Firuzə Əliyeva

Türkiyədə prezident seçkiləri keçiriləcək?