Ev konservlərində botulizm riski – Həkimdən VACİB TÖVSİYƏLƏR

Ev şəraitində hazırlanan konservlər botulizm riski yarada bilər. Xüsusilə tərəvəz, göbələk, balıq və ət məhsullarının düzgün hazırlanması və saxlanması ciddi əhəmiyyət daşıyır.

Sfera.az xarici mediaya istinadən xəbər verir ki, “SberZdorovye” tibb şirkətinin infeksionisti Yekaterina Boldıreva ev konservlərində botulotoksin yaranması riskini azaltmaq üçün bir sıra tövsiyələr verib.

Həkim ilk növbədə konserv hazırlamaq üçün yalnız zədələnməmiş, xarici görünüşü sağlam tərəvəz, göbələk, meyvə və giləmeyvələrdən istifadə etməyi məsləhət görüb. Məhsullar hazırlanmazdan əvvəl axar su altında yaxşıca yuyulmalıdır.

Mütəxəssis bildirib ki, yoxlanılmış reseptlərdə göstərilən duz, şəkər və sirkə kimi turşulaşdırıcı maddələrin miqdarını azaltmaq olmaz. Bu komponentlər botulotoksin yarada bilən bakteriyaların inkişafını məhdudlaşdırmağa kömək edir.

İnfeksionist ev şəraitində balıq və ət konservləri hazırlamaqdan çəkinməyi də tövsiyə edib. Bu məhsulların düzgün emal edilməməsi təhlükəli nəticələrə səbəb ola bilər. Balıq konservləşdirilməzdən əvvəl dərhal təmizlənməli, daxili orqanları və pərdələri çıxarılmalı, sonra isə axar su altında yaxşıca yuyulmalıdır.

Həkim əlavə edib ki, hazırlanan hər bir konserv bankasının üzərinə hazırlanma tarixi yazılmalıdır. Botulizm riskini azaltmaq üçün ev konservlərini tanımadığınız şəxslərdən və qeyri-rəsmi satış yerlərindən almaqdan da çəkinmək lazımdır.

Botulizm nə üçün təhlükəlidir?

Botulizm sinir sisteminə təsir edən botulotoksinin yaratdığı ağır zəhərlənmədir. Xəstəlik görmə pozğunluğu, udma və danışma çətinliyi, əzələ zəifliyi və tənəffüs problemləri ilə müşayiət oluna bilər.

Vacib məqam: Duz, şəkər və sirkəni reseptə uyğun istifadə etmək riski azalda bilər, lakin konservin təhlükəsizliyinə zəmanət vermir. Botulizm toksini olan məhsulun görünüşü, qoxusu və dadı normal qala bilər. Şübhəli konservin dadına baxmaq olmaz. Ev konservlərinin hazırlanmasında məhsula uyğun, etibarlı istilik emalı və konservləşdirmə qaydalarına ciddi əməl edilməlidir.

Fatimə

Sfera.az