“Mayonez ən populyar souslardan biridir, lakin onun müntəzəm istifadəsi sağlamlıq üçün təhlükəli ola bilər”.

Sfera.az xəbər verir ki, bu barədə “İzvestiya” nəşrinə açıqlamasında terapevt-diyetoloq Yelena Truskova məlumat verib.

“Ənənəvi mayonezin tərkibinə bitki yağı, yumurta, xardal, duz və şəkər daxildir. Mağazalarda satılan məhsullarda isə əlavə olaraq konservantlar, dad gücləndiriciləri və rəngləndiricilər olur”, — deyə Truskova bildirib.

Onun sözlərinə görə, mayonezin faydası onun tərkibindəki A, D, E və K kimi yağda həll olan vitaminlərlə bağlıdır. Bu maddələr toxluq hissini təmin edir. Lakin əsas təhlükə mayonezin yüksək kalorili olması və keyfiyyətsiz bitki yağlarından hazırlanmasıdır.

“İstehsalçılar çox vaxt günəbaxan və soya yağlarından istifadə edirlər. Bu yağlar omega-6 yağ turşuları ilə zəngindir. Onların həddən artıq qəbulu damar divarlarında və digər toxumalarda xroniki iltihabi proseslərə səbəb ola bilər ki, bu da aterosklerozun inkişafını sürətləndirir”, — deyə Truskova xəbərdarlıq edib.

Diyetoloq əlavə risklərə də diqqət çəkib. Belə ki, mayonezin tərkibindəki konservantlar və dad artırıcılar allergik reaksiyalara və bağırsaq mikroflorasının pozulmasına səbəb ola bilər.

Məhsulun yüksək duz və şəkərlə zəngin tərkibi isə orqanizmdə şişkinlik və artıq çəkiyə yol açır.

Mütəxəssis, ürək-damar xəstəlikləri, həzm sistemi pozuntuları və artıq çəkidən əziyyət çəkən insanlara mayonezdən uzaq durmağı tövsiyə edib. Uşaqlar üçün isə mağaza mayonezi ümumiyyətlə məsləhət görülmür.

Yelena Truskova alternativ olaraq ev şəraitində hazırlanmış mayonezi tövsiyə edib. “Zeytun yağından istifadə etmək, duz və şəkərin miqdarını azaltmaq və kimyəvi qatqıları istisna etmək evdə hazırlanan mayonezi daha təhlükəsiz edir”, — deyə o bildirib.

Ənənəvi reseptdən tamamilə imtina etmək istəyənlər üçün isə həkim iki faydalı sous variantı təklif edib: biri yunan yoqurtu, xardal və limon suyundan ibarət, digəri isə avokado, göyərti və ədviyyatlardan hazırlanan sousdur.

“Əsas qayda odur ki, souslar az miqdarda hazırlanmalı və bir gün ərzində istifadə olunmalıdır. Bu həm yeməklərin dadını qoruyur, həm də sağlamlıq üçün təhlükə yaratmır”, — deyə diyetoloq qeyd edib.

Diyetoloqdan XƏBƏRDARLIQ– Bu şəxslərə mayonez yemək olmaz