Avropada orta ömür müddəti artıb – Ən uzun bu xalqlar yaşayır
Avropa Statistika İdarəsi (Eurostat) Avropa İttifaqı (Aİ) ölkələrində orta ömür müddətinə dair yeni hesabatını açıqlayıb. Məlumatlara görə, 2023-cü ildə Aİ ölkələrində orta ömür müddəti əvvəlki illə müqayisədə 0,8 il artaraq 81,4 ilə çatıb. Beləliklə, COVID-19 pandemiyasının təsirlərindən sonra ömür müddəti 2019-cu il göstəricilərini keçib.
Sfera.az “Cumhuriyet”ə istinadən xəbər verir ki, 2002-ci illə müqayisədə Avropada orta ömür müddəti 3,8 il artıb. Qadınların orta ömür müddəti kişilərdən 5,3 il çox olub. Hazırda Aİ ölkələrində qadınların orta ömür müddəti 84 il, kişilərin isə 78,7 il təşkil edir.
Avropada ən uzun ömür müddəti İspaniyada (84 il), İtaliyada (83,5 il), Lüksemburq, Malta və İsveçdə (83,4 il), Fransada isə 83 il olaraq qeydə alınıb. Almaniyada bu göstərici 81,1 ildir.
Ən aşağı ömür müddəti isə Latviyada (75,6 il), Bolqarıstanda (75,8 il) və Rumıniyada (76,4 il) qeydə alınıb.
Bəs Azərbaycanda orta ömür müddəti neçə ildir?
Dövlət Statistika Komitəsinin məlumatına görə, 2023-cü ildə Azərbaycanda orta ömür müddəti 74 il olub. Bu göstərici qadınlarda 76,4 il, kişilərdə isə 71,5 il təşkil edib. Ölkəmizdə son illərdə səhiyyə xidmətlərinin yaxşılaşdırılması və həyat keyfiyyətinin artması nəticəsində bu rəqəmlərdə müəyyən irəliləyiş müşahidə olunur.
Bəsti Rəfizadə
