Uşaqlar qışda daha çox xəstələnir? – “Soyuq hava xəstəlik yaratmır, amma…”

Qış aylarında havaların soyuması ilə birlikdə xəstəliklərin artdığı müşahidə olunur. Xüsusilə uşaqlar arasında qrip və soyuqdəymə halları daha çox yayılır. Valideynlər isə soyuq havanın birbaşa xəstəliklərə səbəb olub-olmadığını bilmək istəyirlər.

Sfera.az "Haber Türk"ə istinadən xəbər verir ki, Düzcə Atatürk Dövlət Xəstəxanası uşaq sağlamlığı və xəstəlikləri mütəxəssisi Burak Yaşar mövzu ilə bağlı açıqlama verərək, soyuq havanın xəstəlik yaratmadığını, lakin immuniteti zəiflədərək infeksiyalara yol aça biləcəyini bildirib. 

Mütəxəssis qeyd edib ki, tez-tez xəstələnən, immun sistemi zəif olan, vaxtından əvvəl doğulmuş və ya evdə bir neçə uşaq olan ailələrdə infeksiya riski daha yüksək ola bilər. Buna görə də valideynlər müəyyən qaydalara əməl etməlidirlər: "Uşaqları hava şəraitinə uyğun və isti geyindirmək, qarla oynadıqdan sonra saç və əllərin yaş qalmamasına diqqət yetirmək, xəstəliklərin qarşısını almaq üçün ilıq su, ayran və mineral içkilər qəbul etmək vacibdir. Həmçinin, C vitamini ilə zəngin mövsümi meyvələr (naringi, portağal və s.) yemək, yetərli yuxu almaq uşaqların immunitetini artırmağa kömək edəcək və xəstəliklərə tez-tez yoluxmalarının qarşısını alacaq".
Həkimin sözlərinə görə, sadalanan tədbirlərə əməl olunarsa, soyuq hava xəstəlik riski yaratmaz. Mütəxəssis valideynləri panikaya düşməməyə və uşaqları düzgün şəkildə qorumağa çağırır. 

Bəsti Rəfizadə