Aralıq orucu zamanı nələrə diqqət etmək lazımdır? - AÇIQLAMA
Aralıq orucu və yaxud digər adıyla fasiləli aclıq proqramları son dövrlər arıqlamaq istəyənlərin üz tutduqları üsullardan biridir.
Bəs aralıq orucu nə deməkdir?
Mövzu ilə bağlı Sfera.az-a danışan dietoloq Vüsalə Babayeva bildirib ki, aralıq orucu dedikdə, 15-16 saat aclıqdan yox, 48, hətta 72 saatlıq orucdan söhbət gedir.
“Fasiləli aclıqla bağlı bir sıra məqamlara diqqət yetirmək lazımdır. Yoxsa insan sağlamlığında ciddi problemlər yarada bilər. Aralıqlı orucun bir sıra faydaları var. Arıqladır, zehni inkişaf etdirir, diqqəti toplamağa kömək edir və ürəyin işini nizama salır. Amma fasiləli aclıq zamanı bir sıra nüanslara diqqət etmək lazımdır. Müəyyən müddət ərzində ac qaldıqda bəzi problemlər özünü göstərir. Fasiləli aclıqdan sonra az miqdarda yemək qəbul etmək lazımdır. Karbohidratlı qidalar yerinə, proteinli qidalara üstünlük vermək tövsiyə edilir. Fasiləli aclıqdan sonra orqanizmi yeməyə tədricən öyrəşdirmək lazımdır”.
Dieotoloq qeyd edib ki, aralıq oruc zamanı insan orqanizmində sink çatışmazlığı yarana bilər.
“Sink çatışmazlığı zamanı immun sistemi zəifləyir, dəridə bəzi problemlər yaranır və qastrit riski çoxalır. Fasiləli aclıq zamanı qida maddələrindən məhrum qalmaq da problemdir. Bu orucluq periodunda B vitamini ilə zəngin qidaları daha çox qəbul etmək lazımdır”.
Ülkər Abdurahmanlı
