Xəbər verdiyimiz kimi, “Orta ixtisas təhsili üzrə ixtisasların Təsnifatı”nda dəyişiklik edilib. Belə ki, səhiyyə, rifah və xidmət ixtisasları qrupuna yeni ixtisas olaraq optometriya əlavə olunub. Bu ixtisası bitirənlər oftalmoloq kimi fəaliyyət göstərəcəklər.

Təhsil eksperti Kamran Əsədov qərar ilə bağlı Sfera.az-a açıqlamasında bildirib ki, bu ixtisas universitetlərdə də tədris edilməlidir:

“İndiyə qədər tibb üzrə orta ixtisas təhsili müəssisələrində (kollec) Mamalıq işi, Tibbi profilaktika, Tibb bacısı (qardaşı) işi, Ortopedik stomatologiya, Müalicə masajı, Laboratoriya diaqnostikası, Əczaçılıq ixtisasları üzrə kadr hazırlığı həyata keçirilib. Ölkədə tibbin bütün sahələri üzrə ixtisaslı mütəxəssislərə ehtiyac var. Kimlərsə 3-5 aylıq kurslar ilə apteklərdə göz müayinə və müalicəsini həyata keçirir ki, bu da bəzən ağır fəsadlara yol açır”.

Qeyd edək ki, optometriya gözlərin və əlaqəli strukturların qüsur və ya anormallıqlar üçün müayinəsini əhatə edən ixtisaslaşmış bir sağlamlıq peşəsidir.Optometristlər adətən hərtərəfli ilkin göz baxımı təmin edən səhiyyə mütəxəssisləridir. Onlar göz sahəsində ixtisaslaşmış, göz xəstəlikləri olan xəstələrin görmə keyfiyyətini yaxşılaşdırmaq üçün çalışan tibb işçiləridir.

Optometrist peşəsi oftalmoloqla qarışdırılır. Halbuki, ikisi çox fərqli peşələrdir. Optometristlər həm də xəstələrə kontakt linzaları və eynəkləri tövsiyə etmək və satmaq hüququ olan insanlardır. Optometristlər çox vaxt özəl praktikada işləməyə üstünlük verirlər. Optometristlərin əsas vəzifəsi görmə keyfiyyətini yaxşılaşdırmaqdır.

Firuzə Əliyeva

"Universitetlərdə də tədris edilməlidir" - Ekspert yeni qərarı ŞƏRH ETDİ