Ət xörəklərini qatıqla yeməyin - Ziyanları
Sağlıq
23:59 / 22.06.2016
3154
Azərbaycanda bəzi ət xörəkləri süfrəyə qatıqla verilir. Ət xörəklərini yeyəndə biz ayran, dövğa içirik. Sağlamlıq baxımından bu düzgün deyil.
Sfera.az saglamolun.az-a istinadən bildirir ki, ət insan orqanizminin normal fəaliyyəti üçün vacib məhsullardan biridir. Ət orqanizmi aminturşular, vitaminlər, minerallarla təmin edir. Bu minerallardan ən vacib olanı dəmirdir. Dəmirin əsas hissəsini biz məhz ət məhsullarından alırıq.
Dəmir insan orqanizmində olduqca böyük rol oynayır. Dəmir oksigenin saxlanması və daşınmasında iştirak edir. Oksigensiz insan orqanizmi yaşaya bilməz.
Dəmir qanyaratma prosesində iştirak edir, immun sisteminin normal fəaliyyəti üçün çox vacibdir, qalxanvari vəzi hormonlarının istehsalında, ciyərdə gedən proseslərdə (zəhərli maddələrin parçalanmasında və s.), DNT-ın sintezində və bir çox digər vacib proseslərdə iştirak edir. Dəmir xərçəng hüceyrələrinin inkişafını ləngidir. Orqanizmdə dəmirin çatışmazlığı ciddi pozulma sayılan anemiya xəstəliyinə (qanazlığı) səbəb olur.
Bəzi maddələr orqanizmdə dəmirin mənimsənilməsi prosesini sürətləndirir (C, B qrupu vitaminləri və s.), digərləri isə əksinə, pozur. Dəmirin mənimsənilməsini pozan maddələr arasında kalsium və fosfor da var. Süd məhsulları kalsium və fosforla zəngin olduğundan onların ətlə birlikdə qəbulu dəmirin mənimsənilməsinə mənfi təsir edir. Bu o deməkdir ki, ətlə birlikdə və ya ət xörəklərindən dərhal sonra istənilən süd məhsullarını qəbul etmək düzgün deyil.
Tək süd məhsulları deyil, çay və qəhvədə olan bəzi maddələr dəmirin mənimsənilməsini pozur. Bu səbəbdən həkimlər ət xörəklərindən sonra çay və ya qəhvə içməyi tövsiyə etmir.
