Banklara niyə etibar etməliyik? - İqtisadçılardan TÖVSİYƏ
17:00 / 23.02.2018
4359
Son dövrlərdə bir çox banklar bağlandı. Belə vəziyyətdə insanları hansı banklara etibar etmək məsələsi düşündürür.
Sfera.az bu haqda tanınmış iqtisadçıların fikrini öyrənib:
İqtisadçı ekspert Natiq Cəfərli bildirib ki, bank sektorunun ən böyük problemi kreditlərdir:
"İstənilən bankda problemli kredit məsələsi yaşanır. Banklarda problemli kreditlərin həcmi artırsa, deməli o bankların tam gücü ilə fəaliyyət göstərməsi üçün imkanları məhdudlaşır. Dünya praktikasında problemli kreditlərin həcmi 3%-dən yuxarı olduqda həmin banklarda yenidən kredit siyasətinə baxılır. Azərbaycanda rəsmi rəqəmlərə görə, ümumi bank sektorunda kreditlərin həcmi artaraq 15%-i keçib. Elə banklar var ki, bu hədd hətta 30-35%-i keçib. Beynəlxalq agentliklərin hesablamalarına görə, bəzi banklarımız artıq bu siyahıya daxil olub. Ona görə də digərlərinə nisbətən ayaqda güclü dura bilən banklar haqqında danışmaq olar. Buna baxmayaraq, ümumilikdə bank sektorunda ciddi problemlər var".
Ekspertin fikrincə belə vəziyyətdə vətəndaşlar üçün ən yaxşı həll yolu bazarda oturuşmuş banklara etibar etməkdir:
"Ümumilikdə götürdükdə təbii ki, bazarda oturuşmuş banklardan bir neçəsi var ki, onlar digərlərinə nisbətən daha bəyanatlı görünür. Həmin siyahıya ilk növbədə Kapital Bankı daxil edə bilərik. Beynəlxalq Bankın problemləri çoxdur amma dövlət dəstəyi olduğu üçün hələ də ən böyük banklardan biridir. 3-cü isə Paşa Bankdır. Bəzi belə banklar var ki, digərlərinə nisbətən daha sağlam şəkildə ayaqda dururlar".
İqtisadçı alim Vüqar Bayramov isə banklara etibar edərkən vətəndaşların diqqət etməli olduqları məqamları xüsusi vurğulayıb:
"Vətəndaşlar banklara etibar edərkən seçim qarşısında qalırlar. Düşünürəm ki bankların adlarını çəkmək biraz məqsədə uyğun deyil. Hansısa bankın adının qeyd edilməsi digər banklara haqsızlıq olar. Amma, vətəndaş banka əmanət etdiyi zaman bir neçə məqama diqqət yetirməlidir. Bunlardan biri ondan ibarətdir ki, əvvəla banklar illik hesabat elan etməlisdirlər. Bank illik hesabatını mütləq ictimaiyyətə açıqlamalıdır. u haqda məlumatı öz rəsmi internet səhifəsində yerləşdirməlidir. Əgər bank hesabatlarını internet səhifələrində yerləşdirmirsə, deməli həmən banka güvənmək, hesabda pul saxlamaq və depozit yerləşdirmək olmaz. Yalnız o banklarda depozitin yerləşdirilməsinə ehtiyac var ki, həmin banklar öz hesabatların daimi olaraq ictimaiyyətə açıqlayır. Birinci mərhələ hesabatların internet səhifələrinə yerləşdirməmələridir. Digər tərəfdən isə vətəndaş bankın zərərlə işləyib işləməməsinə baxmalıdır. Əgər bank ötən il zərərlə işləyibsə, həmən banka əmanətin yerləşdirilməsi arzu olunan deyil. Banka depozit yerləşdirmək istəyən vətəndaş bilməlidir ki, bankın mənfəəti və zərəri nə qədərdir. Nəzərə alsaq ki, bu gün əhəmiyyətli bankların sayında azalma var, vətəndaşların depozit yerləşdirmələri zaman diqqətli olmaları şərtdir".
Vüqar bayramov yüksək faiz verən banklarla ehtiyatlı olmağı tövsiyə edib:
"Əmanət banka yerləşdirildiyi zaman əmanətin sığortalı paketlə yerləşdirilməsinə diqqət etmək lazımdır. Bəzi hallarda vətəndaş daha yüksək faiz verən banklara əmanət yerləşdirir ki, daha çox gəlir əldə etsin. Və sonda vətəndaşın məbləği qorunmadığı üçün vətəndaş bəzi problemlərlə üzləşir. Vətəndaş banka depozit qoyduğu zaman diqqət yetirəcəyi birinci mövzu sığortalı paketin olmasıdır. Çünki sığortalı paketlə gələcəkdə depozitin geri qaytarılması daha rahat başa gəlir”.
Nihat Hüseynzadə
