Xanım deputat: “Hər bir azərbaycanlı Prezidentin bu sərəncamını bəyənir və alqışlayır”
Milli Məclisin deputatı Jalə Əliyeva Prezident İlham Əliyevin sərəncamı ilə Mehriban Əliyevanın Azərbaycanın Birinci vitse-prezident təyin edilməsinə münasibət bildirib.
Deputat "Ölkə.Az”-a açıqlamasında sözügedən sərəncamın zamanında atılan addım olduğunu söyləyib:
"Cənab Prezident İlham Əliyevin müvafiq sərəncamı ilə hörmətli millət vəkili Mehriban xanım Əliyevanın Azərbaycanın Birinci vitse-prezidenti təyin edilməsi təqdirəlayiqdir. Hesab edirəm ki, hər bir Azərbaycan vətəndaşı Prezidentin bu sərəncamını bəyənir və alqışlayır. Azərbaycan qadınları da bu sərəncamı çox sevinclə qarşılayır və dəstəkləyir. Hər kəs Mehriban xanım Əliyevanın bu vəzifənin də öhdəsindən çox ləyaqət və uğurla gələcəyindən əmindir”.
Mehriban Əliyevanın Birinci xanım kimi indiyədək Azərbaycan dövləti və xalqı üçün böyük işlər gördüyünü vurğulayan J.Əliyeva qeyd edib ki, Mehriban Əliyeva Azərbaycan həqiqətlərinin dünyada təbliğ olunması üçün də çox vacib işlər həyata keçirir:
"Mehriban xanım Əliyevanın Azərbaycan dövləti və xalqı üçün gördüyü əvəzsiz işlər danılmazdır. Ona görə də biz hörmətli Mehriban xanımı ürəkdən təbrik edirik, ona yeni vəzifəsində uğurlar arzu edirik”.
