"Parisdə Paşinyanın beynini doldurublar, Rusiya ona sui-qəsd təşkil edə bilər..." - ŞƏRH
“Parisdə Nikol Paşinyanın beynini əməllicə doldurublar”.
Sfera.az xəbər verir ki, bunu açıqlamasında politoloq Elxan Şahinoğlu deyib.
“Paşinyan ötən il Azərbaycanla sülh sazişi imzalamağa yaxınıq deyirdisə, indi Azərbaycanın Ermənistan ərazilərinin işğalı və müharibə təhlükəsindən danışır. Bunun qarşılığında da Fransa rəsmiləri “Ermənistanı Azərbaycandan qoruyacağıq” kimi açıqlamalar verirlər. Əvvəlcə Paşinyanı Parisə çağırdılar, o geri dönməyə macal tapmamış Fransanın müdafiə naziri İrəvana getdi və Ermənistanı yeni hərbi texnika ilə təhciz edəcəklərini vurğuladı”,- politoloq qeyd edib.
E.Şahinoğlu qeyd edib ki, Nikol Paşinyanın Ermənistanın Kollektiv Təhlükəsizlik Müqaviləsi Təşkilatında fəaliyyətini donduracağı barədə açıqlaması da Parisin planının tərkib hissəsidir:
“Yəqin, Parisdə Paşinyana söz veriblər ki, Ermənistan KTMT-ni tərk edə bilsə və Rusiya hərbi bazasından qurtulsa, Fransa hərbi kontingenti Ermənistanda yerləşdiriləcək və bu, Ermənistanın təhlükəsizlik təminatı olacaq”.
Siyasi şərhçinin sözlərinə görə, Rusiya Paşinyana sui-qəsd belə təşkil edə bilər:
“Növbəti gediş Kremldədir. Rusiya Paşinyanla Makronun birgə planlaşdırdıqları imic zərbəsinə tuş gəlməmək üçün Ermənistanda qarışıqlıq yaratmaqdan tutmuş Nikol Paşinyana qarşı sui-qəsd təşkil etməyə qədər vasitələri nəzərdən keçirəcək. İkinci Qarabağ müharibəsindən sonra bu alınmadı, Kreml növbəti cəhdə baş vuracaq. Oyunçu aparsın!”
Firuzə Əliyeva
