İran Rusiyaya ballistik raketlər verir - SƏBƏB

İran Rusiyaya çoxlu güclü ballistik raketlər verib.
 

Sfera.az xəbər verir ki, bu barədə altı mənbəyə istinadən "Reuters" agentliyi məlumat yayıb.
 

“Bunu gizlətmək üçün heç bir səbəb yoxdur. İstədiyimiz ölkəyə silah ixrac etmək icazəmiz var”, - deyə İran rəsmilərindən biri agentliyə bildirib.
 

İranın üç mənbəsi agentliyə bildirib ki, respublika Rusiyaya 400-ə yaxın raket verib ki, onların da çoxu “Fateh-110” qısa mənzilli ballistik raketlər ailəsinə aiddir. Xüsusilə, söhbət 300-700 kilometr məsafədəki hədəfləri vura bilən “Zülfiqar” raketlərindən gedir.
 

Bildirilir ki, Rusiya indiyədək ən azı dörd raket göndərişi alıb və yaxın həftələrdə daha çox göndərişin daşınacağı gözlənilir. İranlı mənbələrdən birinin dediyinə görə, İran və Rusiya hərbçiləri arasında Tehran və Moskva görüşləri zamanı əldə olunmuş razılaşmanın şərtlərinə əsasən, tədarüklər yanvarın əvvəlində başlayıb.
 

İranın Müdafiə Nazirliyi bu məlumatı şərh etməkdən imtina edib. İranın raket proqramına cavabdeh olan elit bölmə olan İnqilab Keşikçiləri Korpusu da şərh verməkdən boyun qaçırıb.
 

Xatırladaq ki, fevralın 13-də İranın dənizdən buraxılan ilk uzaqmənzilli ballistik raketini buraxdığı xəbəri yayılıb.

İnci