91 yaşlı xanımın reallaşan arzusu: "Hazırlaş, biz Şuşaya gedirik!

Sfera.az bildirir ki, qurum rəsmisi sosial media hesabında həmin nəslin nümayəndəsi olan Məryəm Zöhrabbəyova barədə maraqlı məlumat bölüşüb. O, Şuşa azad olunandan bir gün sonra Məryəm xanımın nəvəsinə müraciət edərək, "Hazırlaş, biz Şuşaya gedirik!", -deyə bildirdiyini vurğulayıb:

"Məlum səbəblərə görə, torpaqların geri qaytarılmasının səhəri günü oralara getmək mümkün olmasa da, keçən həftə Məryəm xanımın arzusu gerçəkləşdi və o, ata-baba evini ziyarət etdi. İndi onun 91 yaşı var və xoşbəxt təsadüf nəticəsində onunla məhz Şuşada, Cıdır düzündə tanış olmaq qismət oldu. Məryəm xanımla ilk telefon danışığımız yadımdadır — hiss olunurdu ki, onun ürəyində gerçəkləşməmiş heç bir arzusu  qalmayıb. Tək birindən başqa — doğma evini ziyarət etmək. Onun bu müqəddəs arzusunun həyata keçirilməsində cüzi də olsa, iştirak etmək mənim üçün böyük şərəfdir”.

R.Hacıyev, həmçinin bu istiqamətdə müraciətə cavab verdiyinə və Məryəm xanımın arzusunu gerçəkləşdirməyə kömək etdiyinə görə Məftun Abbasovun şəxsində Şuşa Şəhəri Dövlət Qoruğu İdarəsinə, qonaqpərvərliyinə və göstərdiyi qayğıya görə Qoruğun nümayəndəsi Elşad İsmayılova minnətdarlığını bildirib:

"Məryəm xanım 1940-cı ildən, yəni ailəsinin Bakıya köçmək məcburiyyətində qaldığı vaxtdan bəri doğma şəhərində olmayıb. O, bəy nəslinin nümayəndəsi olmaqla yanaşı, Azərbaycanda kifayət qədər məşhur bir şəxsdir - 1954-cü ildə Azərbaycan Dövlət Universitetinin (indiki BDU) Filologiya fakültəsinin jurnalistika kafedrasından məzun olduqdan sonra ölkəmizin ilk qadın redaktoru olub və 50 ildən artıq müddətdə Azərbaycan radiosunda çalışıb. Məryəm xanımın babası, Əli Əkbər bəy Zöhrabbəyov tərəfindən başladılan həmin evin inşası Abbasqulu bəy Zöhrabbəyov tərəfindən başa çatdırılıb. Tikinti işlərinə İran və Türkiyədən sənətkarlar cəlb olunsa da, memarı əslən qarabağlı olan Kərbəlayi Səfixan Qarabaği idi.

Ev şəbəkəli pəncərələri ilə yanaşı, Abbasqulu bəyin  səfər etdiyi ölkələrdən gətirdiyi sənət əsərləri və çoxlu xalçalarla göz oxşayırdı. O, Rusiya imperiyasında ikinci gildiyanın taciri idi və tez-tez İrana, Türkiyəyə, eləcə də Orta Asiyaya səyahət edirdi. Evdə əksəriyyəti ailə başçısının mükəmməl bildiyi ərəb və fars dillərində olan əsərlərdən ibarət böyük kitabxana var idi. Təəssüf ki, ev erməni işğalçıları tərəfindən demək olar ki, tamamilə məhv edilib, yalnız divarlar və qismən dam qalıb. Hər birimizə məlumdur ki, Qarabağda yüzlərlə, minlərlə ev və memarlıq abidələri də eyni tale ilə üzləşib. Amma, heç kimin şübhəsi olmasın ki, biz hər şeyi daha gözəl bərpa edəcəyik!”.