“Əks halda, ABŞ Ukrayna ilə də vidalaşmalı olacaq” – Zelenski-Bayden görüşü nə vəd edir?
11:26 / 31.08.2021
958
"Politoloqlar arasında Amerika-Ukrayna sammitindən Ukrayna üçün müsbət
nəticələr olacağını proqnozlaşdıranlar yetərincədir. Elə bu görüşə pessimist
yanaşanlar da”.
Bunu Sfera.az-a açıqlamasında politoloq
Əlimusa İbrahimov deyib. O deyib ki, bu görüşün Ukrayna üçün taleyüklü
olacağını bildirənlər Zelenski hökumətinin Rusiya qarşısında təkbaşına bundan
sonra da mübarizə apara biləcəyinin mümkünlüyünə inanır və vəziyyətin köklü şəkildə
dəyişdirilməsi üçün ciddi dəstəyə ehtiyac olduğunu vurğulayırlar:
"Ukrayna-Rusiya qarşıdurmasının birincinin
üstünlüyü ilə nəticələnməsi üçün ABŞ yardım etməlidir. Əks halda, ABŞ Ukrayna
ilə də vidalaşmalı olacaq - Əfqanıstanla vidalaşdığı kimi. Amma bu vidalaşma
Amerika üçün Əfqanıstanın vurduğu zərbədən 10 dəfə artıq zərbə vura bilər. Bunu
Ağ Evdə başa düşməmiş deyillər. Amerikanın və eləcə də Baydenin bu gün
Əfqanıstan uğursuzluğunu ört-basdır edəcək ciddi siyasi addımlar atmağa ehtiyacı var. Bayden-Zelenski sammiti Amerika prezidentinin getdikcə uçuruma
yuvarlanan reytinqini tarazlaya və əksinə düşmə sürətini artıra bilər”.
"Pessimistlər Bayden-Putin, Ərdoğan-Bayden
görüşünün nəticələrini, daha doğrusu, ciddi nəticə verməməsini arqument kimi
ortalığa atırlar. Digər tərəfdən bəzi siyasətçilər Baydenin ABŞ-ın beynəlxalq
nüfuzunun artırılmasına xidmət edəcək strateji qərarların qəbul edilməsində qətiyyətsiz
olduğunu vurğulayır və Əfqanıstan epopeyasını gündəliyə daşıyırlar.
Zelenski çox böyük nümayəndə heyəti ilə görüşə
gəlib. Amerika-Ukrayna münasibətlərini əsas sahələrini əhatə edən nazirliklərin
nümayəndələri buradadır. Ukrayna prezidenti və birinci xanımının media nümayəndələri
üçün iki rəsmi təqdimatı nəzərdə
tutulub.
Ukrayna prezidenti tərəfindən verilən bəyanata
görə, müzakirə olunacaq məsələlər içində " Şimal axını-2”, Donbassda münaqişənin nizamlanması, ABŞ-ın hərbi
yardımı, iqtisadi və investisiya məsələlərinin olacağı gözlənilir.
Günay Rəsulqızı
