Fərdi evlərin tikintisi üçün ipoteka kreditlərinə ehtiyac var - Açıqlama
14:27 / 04.02.2021
1167
Azərbaycanda fərdi evlərin tikintisi üçün güzəştli
şərtlərlə ayrıca kreditin verilməsi təcrübəsi yoxdur.
Sfera.az bildirir ki, bəzi kredit təşkilatları
ev tikintisi üçün kredit ayırır. Lakin bu cür kredit almaq üçün daşınmaz əmlakın
girov qoyulması şərtdir. Bununla bərabər kredit üçün müraciət edilənə qədər təmir
işlərinin 30%-i (tikilinin özülü və divarları) başa çatdırılmalıdır. Kreditin maksimal məbləği isə girov qoyulan əmlakın
dəyərinin 70%-dən artıq olmamalıdır.
Digər kredit təşkilatları, ələlxüsus da
banklar isə tikinti yox, təmir üçün kredit ayırmağa üstünlük verirlər. Banklar
hesab edir ki, tikintisinin 80 faizi başa çatmayan daşınmaz əmlaka kredit yönəltmək
olduqca risklidir. Çünki ayrılan vəsaitlə tikintini hansısa ciddi şirkət deyil,
şəxsin özü apardığından inşaat işlərinin proqnozlaşdırılan vaxtda və qaydada
başa çatdırlması mümkün olmaya bilər. Buna görə də banklar bir qayda olaraq
istifadədə olan və sənədi mövcud olan mənzillərə, daşınmaz əmlaka kredit ayırır.
Təcrübə göstərir ki, şəxsi mənzil tikintisi
üçün güşəştli kredit almaq imkanlarının yaradılması olduqca əhəmiyyətlidir. İlk
növbədə ona görə ki, ölkə əhalisinin böyük əksəriyyəti məhz fərdi tikililərdə məskunlaşmağa
üstünlük verir.
"Banklar hazır, sənədləri qaydasında olan fərdi
yaşayış evlərinin alınmasına ipoteka krediti ayırır. Amma ipoteka kreditləşməsi
zamanı banklar daha çox çoxmənzilli binalardakı evlərin alqı-satqısına üstünlük
verirlər. Fərdi evlərə də ipoteka kreditinin verilməsi təcrübəsi var. Bu zaman
daşınmaz əmlakın və torpağın sənədləri qaydasında olması şərtdir”.
Bunu Sfera.az saytına açıqlamasında "Unipirice"
Ekspertiza və Qiymətləndirmə Mərkəzinin direktoru Ramil Qasımzadə bildirdi. R.Qasımzada
hesab edir ki, fərdi yaşayış sahələrinin tikintisi üçün güzəştli şərtlərlə
kredit verilməsi təcrübəsi öyrənilməlidir. Onun fikrincə fərdi ev tikiləcək torpaq
sahəsini girov götürüb tikinti üçün kredit verilə bilər. Həmsöhbətimiz bunun üçün
mexanizmin hazırlanmasının və vəsait ayrılmasının vacib olduğunu düşünür.
R.Qasımzadə zamanla bu kimi məsələlərin həllinin
mümkün olduğunu da söylədi: "Əvvəllər banklar yalnız sovet dövründə inşa edilən
mənzillərin ipoteka ilə alınmasına kredit ayırırdı. Çünki həmin mənzillərin sənədləri
qaydasında idi. Hazırda isə köhnə mənzillərlə bərabər yeni mənzillərin də
ipoteka yolu ilə alınmasına kredit verilir. Artıq yeni mənzillərin də sənədləşməsi
qaydaya salınıb. Hələ də banklar kredit cəlb edib, sonradan
tikinti aparılması təcrübəsinə ehtiyatlı yanaşır”.
Vasif
