"Moskva ilə Ankara daha çox türk hərbçisinin Azərbaycana gəlməsi barədə razılaşıb" – AÇIQLAMA
16:30 / 18.11.2020
3927
"Bu vəziyyət Azərbaycan və Türkiyəyə əlavə manevr imkanları verir”
Sfera.az-a açıqlamasında bu sözləri Monitorinq Mərkəzində fəaliyyət üçün Türkiyənin Azərbaycana hərbi qüvvə göndərməsini dəyərləndirərkən politoloq Nazim Cəfərsoy deyib:
"Bununla bağlı detallar hələ tam aydın deyil. Gələn türk hərbçiləri tək Monitorinq Mərkəzində olacaq, yoxsa məsələnin başqa tərəfi var? Burada gedən prosesi Suriyadakı prosesə oxşadıram. Putin dünən çıxışında təmas xəttində türklərin olmasına mənfi mövqe bildirdi. Amma bu o demək deyil ki, rusla türk, ikisi birlikdə başqa hardasa olmayacaq. Bu istiqamətdə ümumi mənzərə tam dəqiqləşməyib”.
Həmsöhbətimiz qeyd etdi ki, Türkiyə ölkəmizə hərbi qüvvəni 2010-cu ildə bağlanan müqaviləyə istinad etməklə göndərir:
"Hələlik nə qədər Türkiyə hərbçisinin gələcəyini bilmirik. Türkiyə hökuməti Azərbaycana hərbi qüvvə göndərmək üçün parlamentə etdiyi müraciətində ölkəmizə əsgərlərini 2010-cu ilin ikili müqaviləsinə əsaslanmaqla göndərdiklərini bildirib.
Bu isə Azərbaycan, həm də Türkiyəyə əlavə manevr imkanları yaradır. Həmin məqam Bakı ilə Ankaraya imkan verəcək ki, Azərbaycandakı türk hərbi kontingentinin fərqli formada olsa da sayını artırsın. Məsələn, 100 nəfər türk hərbçisi sülhməramlıların Monitorinq Mərkəzinə, yerdə qalan qüvvələr isə Bərdə, Ağdam, Füzuli və ya Gəncədə yerləşmək üçün gələ bilər. Belə bir versiya da istisna deyil. Hətta düşünürəm ki, Moskva ilə Ankara daha genişmiqyaslı türk kontingentinin Azərbaycana gəlməsi barədə anlaşıblar”.
Elçin
Sfera.az
