Ermənistanda yaşayan azərbaycanlılar deportasiya edilsə də, bu gün Azərbaycanda yaşayan on minlərlə erməninin hüquqlarının qorunması təmin edilir.

Sfera.az trend-ə istinadən bildirir ki,bunu insan hüquqları üzrə müvəkkil, Ombudsman Elmira Süleymanova "Din və insan hüquqları" mövzusunda keçirilən konfransda deyib.

Onun sözlərinə görə, 30 il davam edən erməni təcavüzü nəticəsində tarixi Azərbaycan torpaqlarında yaradılan Ermənistanda 100 minlərlə azərbaycanlıdan bir nəfər də olsun qalmayıb: "Azərbaycanlılar Ermənistanın monoetnik dövlət yaratması, etnik təmizləmə siyasəti nəticəsində kütləvi deportasiyaya məruz qalıblar. Buna baxmayaraq, bu gün də ölkəmizdə yaşayan on minlərlə erməninin hüquqlarına hörmətlə yanaşılır, onların hüquqlarının qorunmasını təmin edilir".

Ombudsman əlavə edib ki, Azərbaycanda dinin dövlətdən ayrı olduğu, bütün dini etiqadların qanun çərçivəsində bərabər olduğu qanunvericilikdə qeyd edilib: "Ümumilli lider Heydər Əliyev ölkəmizdə yaşayan azsaylı xalqların, müxtəlif dinlərin nümayəndələrinin hüquq və bərabərliyinə xüsusi diqqət yetirib. Onun siyasəti məhz bu prinsiplər üzərində qurulmuşdu. Tolerant ideyaların əsl məskəni olan Azərbaycan həm tolerantlıq, həm də multikulturalizm sahəsində bütün dünya ölkələri üçün bir nümunə, örnək olub. Bu yalnız nəzəriyyəyə deyil, həyatda da gerçəkləşdirilən siyasətdir".

E.Süleymanovanın sözlərinə görə, fəaliyyət göstərdiyi dövrdə Ombudsman Aparatına müxtəlif məzmunlu şikayətlər edilsə də, məhz dini zəmində təqib olunma, yaxud dini azadlığın pozulması halları ilə bağlı bir dənə də şikayət qəbul edilməyib: "Təəssüflər olsun ki, bəzi dövlətlər dindən istifadə edərək siyasi manipulyasiyalar edir, kütləvi şəkildə insan hüquqlarını pozaraq ksenofobiyaya, qəddarlığa yol verir, dinc əhaliyə qarşı qırğınlar törədirlər. Bu baxımdan din həm dövlət daxilində, həm də dövlətlərarası münasibətdə dağıdıcı alət kimi istifadə edilə bilər. Əslində isə din xalqlar arasında sülh yaradan qüvvədir və bunlar arasında körpü rolunu oynayır".