Bunu Sfera.az-a açıqlamasında Beynəlxalq Münasibətlərin Təhlili Mərkəzinin sədri Fərid Şəfiyev bildirib. F.Şəfiyev bu istiqamətdə Ermənistana təzyiq edilməli olduğunu bildirib:

"Avropa məhkəməsi minalanmış ərazilərin xəritəsinin verilməsi ilə bağlı göndərdiyimiz məktuba müsbət cavab verməlidir. Ermənistanı buna məcbur etməklə bağlı bizim müraciətimiz beynəlxalq müstəvidədir. Biz 30 ildə xəritənin verilməsi ilə bağlı çağırışlar etmişik, addımlar atmışıq. İndiki məqamda bu problemin həlli üçün Ermənistana təzyiqlərin artırılması mütləqdir. Azərbaycanın bunun üçün hazırda gücü və potensialı yetərincədir". 

BMTM sədri beynəlxalq təşkilatların Azərbaycanın "hərbi əsirləri” geri qaytarması ilə bağlı çağırışına da münasibət bildirib. F.Şəfiyev bu istəyin reallaşması üçün ilk olaraq Ermənistanın addım atmalı olduğunu deyib:

"Xəritənin Azərbaycana verilməsi üçün qəti həlledici qurum yoxdur. BMT-nin Baş Assambleyasına bu məsələni çıxarmaq olar. Təhlükəsizlik Şurasında problemi səsləndirsək, nəticə olmayacaq. Çünki burada Fransa, Rusiya yer alır ki, onlar da Ermənistan tərəfindən çıxış edir. İndi mənzərə ondan ibarətdir ki, beynəlxalq təşkilatlar Ermənistandan çox bizə çağırış edir ki, erməni "hərbi əsirləri” geri qaytaraq. Əgər Ermənistan bu yöndə bizdən müsbət hərəkət gözləyirsə, özü də müvafiq addım atmalıdır". 

Qeyd edək ki, işğaldan azad olunan ərazilərin minalanması nəticəsində hələ də itki verməkdəyik. Belə ki, bu gün Azərbaycan Televiziyasının operatoru, 1989-cu il təvəllüdlü Sirac Abışov və AZƏRTAC-ın əməkdaşı, 1982-ci il təvəllüdlü Məhərrəm İbrahimov (Əlioğlu) Kəlbəcər rayonunda xidməti vəzifələrini yerinə yetirərkən minaya düşərək həlak olublar. Hadisə nəticəsində 3 nəfər isə yaralanıb.