ABŞ-dan İranla bağlı “iki həftə” iddiası
ABŞ-ın maliyyə naziri Skott Bessent İranın Çinə göndərilmək üçün dənizdə təxminən 15 milyon barel neftinin qaldığını və bu ehtiyatın tükənməsindən sonra Tehranın təxminən iki həftə ərzində “ticarət edəcək heç nəyinin qalmayacağını” iddia edib.
Sfera.az xəbər verir ki, Bessent “Fox News”a açıqlamasında ABŞ-ın sanksiyaları və dəniz blokadasının İran iqtisadiyyatına ciddi təzyiq göstərdiyini bildirib. Onun sözlərinə görə, neftin böyük hissəsinin Çinə çatdırılmasından sonra İranın xarici ticarət imkanları əhəmiyyətli dərəcədə məhdudlaşacaq.
ABŞ maliyyə nazirliyinin avqustun 24-də elan etdiyi “Operation Economic Outcast” kampaniyası İranın maliyyə, neft, daşımalar və xarici ticarət əlaqələrini hədəf alır.
İran ABŞ-ın dəniz blokadasını aradan qaldırması və neft sanksiyalarını yumşaltması şərtilə Hörmüz boğazını bir həftə ərzində açmağa və nüvə danışıqlarına qayıtmağa hazır olduğunu bildirib.
ABŞ Prezidenti Donald Tramp sentyabrın 26-da bu təklifi qəbul etmədiyini açıqlayıb. Lakin ertəsi gün İranla danışıqların bu həftə davam edəcəyini gözlədiyini deyib.
Bessent Hörmüz boğazından gündəlik 15-22 milyon barel neft keçdiyini iddia edib. Lakin “Reuters”in Vortexa məlumatlarına əsaslanan sentyabrın 21-dəki xəbərinə görə, sentyabr ayında bu göstərici orta hesabla gündə 2,9 milyon barel olub. Beləliklə, ABŞ-ın açıqladığı rəqəmlər müstəqil məlumatlarla təsdiqlənməyib.
Çin uzun müddətdir İran neftinin əsas alıcısıdır. ABŞ bu səbəbdən İran neftinin daşınması, maliyyələşdirilməsi və alınmasında iştirak edən xarici şirkət və maliyyə qurumlarına qarşı da sanksiyalar tətbiq edir.
İran isə ABŞ-ın sanksiyalarını və dəniz blokadasını qanunsuz iqtisadi təzyiq kimi qiymətləndirir və mümkün razılaşmanın əsas şərtlərindən biri kimi sanksiyaların aradan qaldırılmasını tələb edir.
Mənsumə
