Pulsuz tətil arzusunda olanlara unikal fürsət
Avstraliyanın Kvinslend bölgəsində, Böyük Sədd Rifinin (Great Barrier Reef) mərkəzində yerləşən Orfey adası 2027-ci ildə könüllülərə pulsuz qalmaq imkanı təqdim edir. Bunun qarşılığında iştirakçılardan adanın ərazisinin qorunmasına, təmizliyinə və ümumi baxım işlərinə kömək etmələri tələb olunur.
Sfera.az xəbər verir ki, Ceyms Kuk Universitetinin tədqiqat stansiyasının yerləşdiyi Orfey adasında universitet 2027-ci il üçün könüllülər axtarır. Proqram akademik araşdırma aparmağı deyil adadakı gündəlik işlərə və təbiətin qorunmasına dəstəyi nəzərdə tutur.
Könüllülərin əsas vəzifələri arasında alaq otlarının təmizlənməsi, invaziv bitki növlərinin ərazidən uzaqlaşdırılması, obyektlərin ümumi baxımı və ümumi istifadədə olan məkanların təmiz saxlanılması yer alır.
Əvəzində könüllülərə adada pulsuz yaşayış yeri təqdim olunur. Təsislərdə yataq otaqları, hamam və tam təchiz olunmuş mətbəxlər mövcuddur. Bundan əlavə, Lucinda ilə Orfey adası arasında gediş-gəliş üçün qayıq nəqliyyatı da pulsuz təmin edilir.
Proqramda iştirak edənlərin nəzərə almalı olduğu əsas məsələ isə qida təminatıdır. Adada market olmadığı üçün könüllülər öz ərzaqlarını özləri gətirməli və yeməklərini özləri hazırlamalıdırlar.
2027-ci il üçün müraciətlərin dəqiq tarixləri hələ açıqlanmayıb. Universitet ehtiyac və boş yerlərdən asılı olaraq könüllüləri qəbul edir. Müraciət zamanı namizədlər CV-lərini adada qala biləcəkləri tarixləri və obyektlərin baxımında faydalı ola biləcək bacarıqları barədə məlumat təqdim etməlidirlər.
Mənsumə
