Stressin bədəninizdə yaratdığı gizli təhlükələr
Stress gündəlik həyatın ayrılmaz hissəsi olsa da uzun müddət davam etdikdə həm fiziki, həm də psixi sağlamlığa ciddi təsir göstərə bilər. Mütəxəssislər bildirirlər ki, xroniki stress bir çox xəstəliklərin yaranma riskini artırır.
Sfera.az xəbər verir ki, həkimlərin sözlərinə görə, stress zamanı orqanizmdə kortizol və adrenalin hormonlarının səviyyəsi yüksəlir. Bu hormonların uzun müddət yüksək qalması yüksək qan təzyiqi, ürək-damar xəstəlikləri, yuxu pozğunluğu və immun sisteminin zəifləməsi ilə nəticələnə bilər.
Ekspertlər qeyd edirlər ki, stress həzm sisteminə də mənfi təsir göstərərək qarın ağrısı, köp, iştaha dəyişiklikləri və həzm pozğunluqlarına səbəb ola bilər. Bundan əlavə, uzunmüddətli gərginlik baş ağrıları, diqqət dağınıqlığı və davamlı yorğunluq hissi yarada bilər.
Həkimlər stressin mənfi təsirlərini azaltmaq üçün müntəzəm fiziki aktivliklə məşğul olmağı, balanslı qidalanmağı, kifayət qədər yuxu almağı və istirahətə vaxt ayırmağı tövsiyə edirlər. Əgər stress uzun müddət davam edir, narahatlıq yaradır və gündəlik həyata mənfi təsir göstərirsə, psixoloq və ya psixiatr dəstəyi almaq vacib hesab olunur.
Mənsumə
