14 ildir bir ailəni təqib edən fil: 25 nəfər öldü
Nepalda bir fil 25 nəfəri öldürüb. Durbe adlı bu fil 14 ildir eyni ailəni təqib edir. Xüsusilə, o, 2012-ci ilin dekabrında bu ailənin iki üzvünü öldürüb. Bu bazar günü yenidən eyni ailəyə hücum edən fil bir ananı və onun dörd yaşlı uşağını öldürüb.
Sfera.az bildirir ki, yerli sakinlərin qorxduğu nəhəng heyvan, bir vaxtlar yüzlərlə kilometr uzaqlıqdan qaçan Bote ailəsinə yenidən hücum edib.
Vəhşi filin hekayəsi 2010-cu ildə başlayıb. Məhz o zaman Çitvan Milli Parkında yaşayan bu heyvan kəndlərə hücum etməyə və insanları öldürməyə başlayıb. O vaxtdan bəri, ən azı 25 nəfərin ölümünə səbəb olub.
Bote ailəsinin 2012-ci ildə ilk qurbanları Madi rayonunda fil tərəfindən tapdalanan yaşlı cütlük Budhiram və Jarala olub. Valideynlərinin ölümündən sonra oğulları Şaniçara Bote ailəni daha uzaq bir yerə köçürmək qərarına gəlib. Buna görə də onlar bir neçə böyük çayı keçərək Caqatpura köçüblər. İnsanlar onların təhlükəsiz olacağına ümid etsələr də, illər sonra fil onları yenidən tapıb. Gecə Şaniçaranın evinə yaxınlaşan fil divarları dağıdaraq içəridəki insanlara hücum edib.
Şaniçaranın 25 yaşlı gəlini Aşi Bote və dörd yaşlı nəvəsi Bharat dərhal ölüblər. Şaniçara sağ qalsa da, psixoloji şok vəziyyətindədir. Hazırda həkim nəzarəti altındadır.
"Biz böyük çayları keçməyin bizi təhlükəsiz saxlayacağına inanırdıq. Amma illər sonra həmin fil bizi yenidən tapdı, evimizə hücum etdi, gəlinimi və kiçik nəvəmi apardı. Qaçacaq başqa yerimiz yoxdur"- deyə şoka düşən Şaniçara bildirib.
Hücum zamanı evdə doqquz nəfərin olduğu bildirilir. Şaniçara güclü zərbələrdən oyanıb. Gil ev nəhəng filin zərbəsinə tab gətirə bilməyib çöküb.
Aşanın gəlini özünü xilas etməyə çalışıb və körpəsini qucağında götürərək çölə qaçıb, lakin filin ayaqları altında əzilib. Ailəni Şaniçaranın həyat yoldaşı Manqali xilas edib. O, heyvanın qarşısında quru saman yığınını yandırıb. Yanğından qorxan Durbe meşəyə qaçıb.
Bu fil bölgədəki ən təhlükəli vəhşi fillərdən biri hesab olunur. Çitvan Milli Parkı administrasiyasının məlumatına görə, o, 2010-cu ildən bəri sərhəd kəndlərinə hücum edir. Son faciədən sonra ölənlərin sayı 25-ə çatıb.
Ölənlər arasında brakonyerliyə qarşı silahlı iki patrul əsgəri də olub.
Bioloqlar filin aqressiv davranışını bir neçə amilə bağlayırlar. Yetkinlik yaşına çatdıqdan sonra gənc fillər yaşlı, dominant erkəklər tərəfindən sürüdən qovula bilər. Bu müddət ərzində onlar ağır stress keçirir, aqressivləşir və yemək axtaran insanlara yaxınlaşırlar. İnsanlardan yemək tapmağa öyrəşdikdə vəziyyət daha da pisləşir.
2012-ci ildə baş verən ilk faciədən sonra fili öldürmək üçün başqa cəhdlər də olmuşdu. Ordu və meşə gözətçiləri onu Çitvan cəngəlliyində iki həftə axtarıblar. 2012-ci ilin dekabr ayının sonlarında qoşunlar fili tapıb və iki dəfə vurublar. Lakin yaralı heyvan sıx kolluqlarda izini itirib. O vaxt insanlar filin yaralarından öldüyünü güman edirdilər. Lakin 2016-cı ildə fil parkın qərb hissəsində yenidən peyda olub. 2020 və 2023-cü illərdə mütəxəssislər ona bir neçə dəfə xüsusi boyunbağılar quraşdırsalar da, avadanlıq vaxtaşırı nasazlıqlar yaradıb.
Milli Parkın sözçüsü Abinaş Tapa Maqar bildirib ki, onlar yeni texnologiyadan istifadə edərək fili izləməyə çalışırlar. Boyunluqdan çıxan koordinatlar filin faciə günü Bote ailəsinin evinə çox yaxın olduğunu təsdiqləyib.
Öz növbəsində kənd sakinləri hakimiyyəti hərəkətsizlikdə günahlandırırlar. Onlar son faciədən sonra etiraz edərək Rapti körpüsünü bağlayıblar. Sakinlərin sözlərinə görə, hakimiyyət illərdir insanları təhlükəli heyvandan qoruya bilmir.
Qoruq administrasiyası artıq insanlara qarşı növbəti hücumların qarşısını almaq üçün ucqar Suxibhar rayonundakı Durbeni təcrid edəcəyinə söz verib.
\
Aynil