Dünyanın ən sədaqətsiz xalqlarının adı açıqlanıb. “Insider Monkey” tərəfindən 30 ölkədə 1.9 milyondan çox insanın məlumatları əsasında aparılan araşdırmaya görə, Tayland xəyanət üzrə dünya birincisidir. Ölkədə hər iki nəfərdən biri, əhalinin 51 faizi münasibətdə olduğu partnyorunu aldadıb.

Sfera.az xarici mediaya istinadən xəbər verir ki, mütəxəssislər bu statistikanın arxasında Tayland cəmiyyətində normal qarşılanan bir mədəniyyətin, “Mia Noi”, yəni “kiçik yoldaş” adətinin durduğunu bildirirlər.

Bu ənənəyə əsasən, evli bir kişi ikinci qadınla münasibət yaşaya və ona maddi dəstək göstərə bilər. Həmçinin, ölkədə inkişaf etmiş cinsi münasibət sənayesi də xəyanətin yayğınlaşmasına səbəb olur.

Araşdırma göstərib ki, xəyanət yalnız şəxsi deyil, həm də mədəni və sosial səbəblərlə sıx bağlıdır.

Avropa qitəsində də xəyanət göstəriciləri diqqət çəkir. Gözləntilərin əksinə olaraq, Avropanın ən sədaqətsiz ölkəsi cənub deyil, şimalda yerləşən Danimarkadır. Bu ölkədə xəyanət edənlərin nisbəti 46 faiz təşkil edir.

Almaniya və İtaliya isə 45 faizlə Danimarkanı izləyir. İspaniya, Böyük Britaniya və Belçika kimi ölkələrdə isə bu rəqəm 36-40 faiz arasında dəyişir.

Skandinaviya ölkələri olan Norveç və Finlandiya kimi cinsiyyət bərabərliyinin yüksək olduğu yerlərdə də xəyanət faizi 40%-dən yuxarıdır. Bu isə xəyanətin səbəblərinin kompleks və fərqli sosial kontekstlərdə formalaşdığını göstərir.

Fransa da siyahıda ön sıralarda yer alır. Burada 43 faiz göstərici ilə xəyanət hadisələri geniş yayılıb. Mütəxəssislərə görə, fransız cəmiyyətində xəyanət çox zaman emosional boşluq, sevgi və diqqət çatışmazlığı ilə izah olunur. Bu da evlilikdənkənar münasibətlərin müəyyən mənada cəmiyyətdə normallaşmasına yol açır.

Bəsti Rəfizadə
Sfera.az

Dünyanın ən sədaqətsiz xalqı - İki nəfərdən biri xəyanət edir