Dünyanın ən bahalı SAAT MARKALARI - Məşhurlar hansından daha çox istifadə edir?

Saatlar həm qadınların, həm də kişilərin əvəzolunmaz aksesuarlarından biridir. Biz saat vasitəsilə nəinki, zamanı izləyirik, həm də ondan “vizit kartı” kimi istifadə edə bilirik. Yəni məhz bu aksesuar insanlara öz zövqünü nümayiş etdirməyə, cəmiyyətdəki mövqeyini ifadə etməyə, seçilməyə şərait yaradır. Bəziləri saatlara adi aksesuar kimi yanaşsa da, müəyyən bir qism üçün o, bir ehtiras, statusunun simvolu, mirasdır.

Beləliklə, Sfera.az dünyada trend olan və ən bahalı saatlarla bağlı maraqlı məlumatı təqdim edir.

Dünyanın ən bahalı saat markaları, ümumiyyətlə, İsveçrə və Almaniya istehsalı olsa da, bu gün başqa ölkələrdə dizayn edilən innovativ və yüksək qiymətli markalara da tələbatın artdığını söyləmək mümkündür. Həmin saatlar qabaqcıl funksiyaları, xüsusi mexanizmləri, keyfiyyəti ilə seçilirlər. 

Hazırda dünyada ən yaxşı saat markaları bunlardır:

1.    F. P. Journe
2.    Richard Mille
3.    Patek Philippe
4.    Audemars Piguet
5.    Blancpain
6.    Jaeger-LeCoultre
7.    Vacheron Constantin
8.    Breguet
9.    Hublot
10.    A Lange & Söhne
11.    Girard-Perregaux
12.    Panerai
13.    Rolex
14.    Montblanc
15.    IWC
16.    Piaget
17.    Omega
18.    Cartier
19.    Ulysse Nardin
20.    Chopard
21.    Breitling
22.    TAG Heuer

Bəs lüks saatlar niyə bahadır?

Ən baha saat markalarını və modellərini araşdırarkən rəqəmlərin bəzən lüks ev və avtomobillərlə rəqabət apardığını da görürük. Onlar zərgərlik məhsullarından belə baha ola bilirlər. Dəbdəbəli saatların qiymətləri çoxlarını təəccübləndirsə də, hər saatın minlərlə hissədən ibarət olduğunu və sənət əsəri kimi işləndiyini bilənlər onun sadəcə vaxtı göstərən əşya olmadığının fərqindədirlər. Adətən ən bahalı saat modellərinin çoxu sənətkarlar tərəfindən hazırlanır, yəni onlar əl işidir.  Həmin ustalar qiymətli metallar və yüksək keyfiyyətli materiallarla çalışır, təbii olaraq bu da, saatların qiymətlərinin artmasına səbəb olur. Hazırda qızıl və ya gümüş korpuslar, yüksək keyfiyyətli və davamlı polad materiallar, almaz və ya almaz hissələri bahalı saatlar üçün əvəzolunmazdır. Məhsulların həm daxili, həm də eksteryerində istifadə olunan dəyərli materiallar qiymətə birbaşa təsir göstərir. Bundan əlavə keyfiyyətli materiallardan istifadə sayəsində dünyanın ən bahalı saat modelləri adi saatlardan çox daha davamlı və uzunömürlüdür. Ən bahalı qol saatları üzərində dünyanın ən yaxşı dizaynerlərinin imzaları da olur. Yəni dizayn dəyəri ilə yanaşı, dizaynerin adı da istehsal edilən məhdud sayda saatların qiymətinə təsir edir. Digər tərəfdən, adətən lüks saatlar məhdud sayda istehsal olunur. Ən bahalı saat markasının hansı olduğunu araşdıranda görürük ki,  ondan istifadə edənlərdən də çox şey asılıdır.  Yəni dünyanın ən zəngin iş adamının istifadə etdiyi aksesuarlar və ən məşhur ulduzlarının “brend səfiri” olduğu məhsullar daha dəyərlidir.

Ən bahalı saatlar və markalar:

F.P. Journe - Brend 1999-cu ildə İsveçrədə yaradılıb. Markanın məşhur saat modelləri “Chronomètre Bleu” və “Souveraine Chronomètre à Resonance”dır. Saatda akustik siqnallar istehsal edən xüsusi osilator var. Bundan əlavə, “Elegante” və “Classique” kolleksiyaları brendin imzasına çevrilib. 2022-ci ildən etibarən “F. P. Journe” saatlarının qiymətləri 14.500 dollardan başlayır. Markanın yüksək səviyyəli saatlarının orta qiyməti 60.000 dollar civarındadır. Bu saatın istifadəçiləri arasında ABŞ aktyoru Robert De Niro, isveçrəli tennisçi Rocer Federer və Rusiya Prezidenti Vladimir Putinin adını qeyd etmək olar.

Richard Mille -  2001-ci ildə qurulan İsveçrə markası aviasiya və kosmik sənayedə istifadə olunan davamlı materiallardan saatlar istehsal edir. Brendin ikonik modelləri arasında “RM 001 Tourbillon”, “RM 033”, “RM 11-03 Automatic Flyback Chronograph”, “RM 52-05” yer alır. Almaniyalı Formula-1 pilotu Mixael Şumaxer, “Maklaren” pilotu Lando Norris, ispan tennisçi Rafael Nadal, amerikalı musiqiçi Pharrell Williams kimi adların taxdığı saatların qiyməti təxminən 60 min - 1 milyon 300 min dollar arasında dəyişir.

Patek Philippe -  Cenevrə saat markası dizaynlarında qızıl və platin kimi qiymətli metallardan istifadə edir. Brendin ən məşhur kolleksiyalarına “Calatrava”, “Complications”, “Grades Complications” və “Nautilus” daxildir. Saatların qiymətləri ən azı 6000 avro civarındadır. Ən bahalı qol saatı markaları arasında yer alan şirkətin 3 milyon avroluq saatları da var. Ed Şeeran, Con Mayer, Viktoria Bekhem və Bred Pitt  “Patek Phileppe” saatlarından istifadə ediblər.

Audemars Piguet -  1875-ci ildən bəri dünyanın ən yaxşı 10 saat markası arasında yer alır. “Royal Oak” modeli ilə tanınır. Hələ də bir ailə şirkəti olaraq mövcud olan şirkət “Patek Philippe Nautilus”, “Royal Oak Offshore”, “Royal Oak Concept "Black Panther"” markalı məhsulları da satışa çıxarıb. Markanın saatlarının qiymətləri 2000 avro ilə 600 min avro arasında dəyişir. Castin Bieber, Uill Smith, Serena Uilliams və Con Legend bu markanın saatlarından istifadə ediblər.

Blancpain - Özünü “dünyanın ən qədim saat istehsalçısı”  kimi təqdim edən “Blancpain” 1735-ci ildə qurulub. “Fifty Fathoms” kolleksiyası və “Submariner” modeli ilə iz qoyan marka, “Fifty Fathoms Tourbillon 8 Jours” kimi çoxfunksiyalı saatları ilə tanınır. Onun “Villeret” və “Ladybird”kimi qadınlar üçün nəzərdə tutulmuş modelləri də var. Bu kolleksiyaların da qatqısı ilə dünyanın ən bahalı qadın saatı markalarından birinə çevrilən “Blancpain”in qiymətləri orta hesabla 6600 avro ilə təxminən 240 min avro arasında dəyişir. Brendin ən məşhur istifadəçiləri arasında Vladimir Putin və Bred Pitt yer alır.

Jaeger-LeCoultre -  İsveçrə saatlarının uğurunu yeni səviyyəyə qaldıran marka zərif dizaynları ilə yadda qalıb. Düzbucaqlı korpus dizaynlı “Reverso” və incə “Master Ultra Thin”, “Master Memovox”, “Deep Sea”, “Master Compressor Diving” modelləri brendin müxtəlif həyat tərzinə uyğun alternativləridir. Ən məşhur kolleksiyalar arasında “Rendez-Vous”, “Hybris Mechanica” və “Polaris” var. 3300 avrodan 440 000 avroya qədər müxtəlif qiymətlərdə dizaynlara rast gəlmək mümkündür. Leonardo DiKaprio, Ceymi Foks, Conn Hamm və Adrien Brodi bu markaya üz tutanlar arasındadır.

Rolex - Qəşəng və dəbdəbəli saatlar dedikdə ağıla gələn ən məşhur markalardan biridir. 1905-ci ildə əsası qoyulan və baş ofisi İsveçrədə yerləşən “Rolex” suya davamlı saatlar istehsal edən ilk şirkətdir. Ona bu adı qazandıran serial “Oyster”dir. Markanın seçilən modelləri arasında “Day-date”, “Daytone”, “Datejust” və “Submariner” yer alır.  “Rolex” saatları istifadəçilərə təxminən 5500 avrodan 268 000 avroya qədər qiymətlərlə təqdim olunur. Bu markaya üstünlük verən məşhur adlar arasında Barak Obama, Bred Pitt və Cennifer Enistona rast gələ bilərik.

Omega -  Astronavtların istifadəsi ilə şöhrəti dünya sərhədlərini aşmış “Omega”, “Master Chronometer” sertifikatı ilə marka imicini gücləndirib.1848-ci ildən bəri yeniliklərə imza atıb. “Omega” saatlarının ən məşhur modelləri “Speedmaster Professional” və “Moonwatch”dır. Bu şöhrət sayəsində Tom Hanks, Daniel Kreiq, Simon Peqq və Steve Karell “Omega” markalı saatlara müraciət edib. Bundan əlavə, brendin saat kolleksiyasında olan məhsulların qiyməti 2022-ci ildə 5200-7150 dollar arasında dəyişib.

Cartier -  Lüks saatların aparıcı markalarındandır. “Santos”, “Tank”, “Panthere” modelləri və “Roadster” kolleksiyası saat modasında kult hesab olunur. “Cartier” dünyada düzbucaqlı siferblat dizayn edən ilk saat markasıdır. Bu brendə üstünlük verən məşhurlar arasında Mayk Cagger Jagger, Mişel Obama, Ceyk Gillenhall kimi adlar var.  Qiyməti 2000-100.000 avro arasında dəyişir.

Chopard - Ən dəbdəbəli qol saatı markalarından biri olan “Chopard”  daxili mexanizmləri ilə rəqiblərindən fərqlənir. Dünyanın ən bahalı saatlarına zinət əşyalarının zərifliyini gətirən brend həm funksional, həm də estetik modellər istehsal edir. “Chopard”ın ikonik seriyaları arasında “Happy Sport”, “Happy Diamonds”, “Imperiale, L.U.C.”, “Mille Miglia”, “Grand Prix de Monaco Historique”, “Superfast” və “La Strada” yer alır.  Qiymətləri 3700 avro ilə 250 min arasında dəyişir. “Chopard” saatlarını taxan məşhurlar arasında Xavier Bardem, Leonardo DiKaprio, Denzel Vaşinqton, Şahzadə Diana və Sandra Ballak var.

Qeyd etdiyimiz modellər ən bahalı saat markalarının sadəcə bir qismidir. 

Günay Rəsulqızı