“Samsung” bu bazarda liderdir
Qatlana bilən smartfon bazarında ümumi geriləmə qeydə alınsa da, "Samsung" mövqeyini daha da gücləndirib. Şirkət bazar payını artıraraq rəqibləri ilə arasındakı fərqi açıb.
Sfera.az xəbər verir ki, “Smart Analytics Global” (SAG) şirkətinin hesabatına əsasən, 2026-cı ilin üçüncü rübündə dünya üzrə qatlana bilən smartfonların tədarükü ötən ilin eyni dövrü ilə müqayisədə 2 faiz azalaraq 7,5 milyon ədəddən bir qədər çox olub.
Bazarın ümumi geriləməsinə baxmayaraq, "Samsung" şirkəti tədarük həcmini ötən ilin müvafiq dövrü ilə müqayisədə 13 faiz artırıb. Şirkətin bazar payı 9 faiz bəndi yüksələrək 69 faizə çatıb. Bu, "Samsung"un 2023-cü ildən bəri qatlana bilən telefon bazarında əldə etdiyi ən yüksək göstəricidir.
"Samsung"un uğurunda yeni “Galaxy Z Fold 8” modelinin mühüm rolu olub. SAG-ın məlumatına görə, bu model şirkətin qlobal qatlana bilən telefon tədarükünün təxminən 55 faizini təşkil edib.
Bazarın ikinci pilləsində olan “Huawei” isə geriləmə ilə üzləşib. Şirkətin qlobal bazar payı 18 faizdən 14 faizə düşüb. SAG bu azalmanın səbəbləri arasında Çində tələbin zəifləməsini və yeni təqdim olunan geniş ekranlı “Pura X View” modelinin gözlənilən nəticəni verməməsini göstərib.
"Lenovo" və "Motorola" isə ümumilikdə 8 faiz bazar payı ilə üçüncü yerdəki mövqelərini möhkəmləndiriblər. Hər iki markanın ümumi bazar payı illik müqayisədə 2 faiz bəndi artıb. Xüsusilə "Motorola Razr" 70 seriyasının daha çox ölkədə və satış kanalında təqdim olunması bu artıma töhfə verib.
"Samsung" istisna olmaqla, digər istehsalçıların qatlana bilən telefon tədarükü illik müqayisədə 24 faiz azalıb. SAG hesab edir ki, yüksək qiymətlər və bu telefonların istehlakçılara təqdim etdiyi istifadə imkanlarının hələ kifayət qədər cəlbedici olmaması bazarın böyüməsini məhdudlaşdırır.
İradə Elsevər
