Dövlət Sosial Müdafiə Fondu (DSMF) bu ilin ilk 4 ayında əvvəlki ilin uyğun dövrü ilə müqayisədə 231 milyon manat daha çox vəsait xərcləyib.

Sfera.az xəbər verir ki, bu dövrdə fond xərcləri 2 milyard 501 milyon manat olub.

Bəs, Fondun xərclərinin artması nə ilə bağlıdır?

Milli Məclisin deputatı Vüqar Bayramov bildirib ki, bütövlükdə, 2025-ci ildə DSMF-in xərclərinin artırılması öncədən proqnozlaşdırılırdı və təsdiq olunmuş büdcədə də öz əksini tapmışdı:

"Belə ki, 2024-cü ildə fondun təsdiq olunmuş xərcləri 6 milyard 949 milyon manat idisə, bu il üçün 7 milyard 676 milyon manat nəzərdə tutulub. Yəni, bu il fondun xərcləmələrinin təxminən 10 faiz çox olacağı gözlənilir. Bu isə həmçinin 2025-ci ildə yeni sosial paketin icrasına başlanılması ilə bağlıdır. 2025-ci ilin ilk 4 ayında fond tərəfindən 17500-dən çox şəxsə pensiya təyin edilib. Bunlar yaşa, əlilliyə və ailə başçısını itirməyə görə pensiya təyinatlarıdır".

Deputat qeyd edib ki, bu baxımdan, növbəti aylarda sosial paketin daha da dərinləşməsi fondun xərclərinə təsir göstərəcək. İzah edib ki, fondun əsas fəaliyyət istiqamətləri pensiya, müaviət, təqaüd, ünvanlı sosial yardım və sığorta üzrədir ki, bu istiqamətlərdə artımlar fond tərəfindən daha çox xərcləmələr deməkdir.

"Digər tərəfdən, qeyd olunan müddətdə fondun gəlirlərində də artım qeydə alınıb. Belə ki, fondun gəlirləri bu ilin yanvar-aprel aylarında proqnozla müqayisədə 13 faiz (305 mln. manat) çox olmaqla 2 milyard 715 milyon manat olub",- millət vəkili nəzərə çatdırıb.

Firuzə Əliyeva
Sfera.az

Pensiya alanlara VACİB XƏBƏR - Bu tarixdən...