ABŞ bu sahədə Çinə uduzacaq: "Üstünlüyümüz uzun sürməyəcək”

“OpenAI”nin baş direktoru Sam Altman ABŞ Senatında verdiyi açıqlamada Amerikanın süni intellekt (SI) sahəsindəki liderliyinin Çin qarşısında davamlı olmayacağı ilə bağlı xəbərdarlıq edib. O, bu sahədə üstünlüyün qorunması üçün davamlı investisiyaların və balanslı qaydaların vacibliyini vurğulayıb.

Sfera.az xarici mediaya istinadən xəbər verir ki, Altman bu fikirləri ABŞ Senatının Ticarət Komitəsində “AMD”, “CoreWeave” və “Microsoft” kimi texnologiya şirkətlərinin rəhbərləri ilə birlikdə qatıldığı panel zamanı səsləndirib.

Paneldə əsas müzakirə mövzusu ABŞ-nin qlobal SI yarışında mövqeyini necə qoruyub saxlaya biləcəyi olub.

Altman əvvəllər süni intellekt sahəsində dövlət tənzimləməsini müdafiə etsə də, son çıxışlarında daha ehtiyatlı mövqe nümayiş etdirib. Onun bu dəyişən mövqeyi Donald Tramp administrasiyasının SI sahəsində irəliləyişə maneə olan qaydaların aradan qaldırılması çağırışları ilə əlaqələndirilib.

Senator Ted Cruzun ABŞ-nin Çin qarşısında bu sahədə üstün olub-olmadığı ilə bağlı sualına cavab olaraq Altman, “OpenAI” və “Google” kimi Amerika şirkətlərinin dünyanın ən inkişaf etmiş modellərini yaratdığını qeyd edib. "Lakin Nə qədər öndə olduğumuzu söyləmək çətindir, amma çox vaxtımız qalmadığını deyə bilərəm”, - deyə bildirib.

Paneldə iştirak edən texnologiya rəhbərləri də Altmanın fikirlərini dəstəkləyərək, sərt məhdudiyyətlər əvəzinə SI infrastrukturu və işçi qüvvəsinin inkişafına daha çox sərmayə qoyulmasının vacibliyini bildiriblər. Altman isə süni intellekt modellərinin bazara çıxmadan əvvəl məcburi test edilməsini tələb edən yanaşmanı “faciə” adlandıraraq sərt tənzimləmələrə qarşı çıxdığını açıq şəkildə ifadə edib.

Bəsti Rəfizadə
Sfera.az