Mərkəzi banklar üçün qızılın cəlbediciliyi hələ də yüksək olaraq qalmaqdadır.

Sfera.az xəbər verir ki, bunu iqtisadçı-ekspert Samir Əliyev deyib.

O bildirib ki, bu maraq 2022-ci ildən sonra xüsusilə artıb.

Ekpertin sözlərinə görə, 2022-ci ilin III rübündə ölkələrin əsas bankları son illərin ən yüksək həcmində - 456,9 ton qızıl alması təsadüfi deyil:

“Sonrakı illərdə alışda tendensiya fərqli olsa da, yəni azalma olsa da bankların marağının hələ də yüksək olduğunu söyləmək olar. 2025-ci ilin I rübündə mərkəzi banklar 244 ton həcmində qızıl alıb. Bu, ötən ilin müvafiq dövrü ilə müqayisədə 21% azdır. Bu il ilk rübündə ən böyük alıcı Polşanın Mərkəzi Bankı olub və ötən il olduğu kimi bu rüb də aktiv alış həyata keçirib. Bazardan 49 ton qızıl alan Polşa (2024-cü ildə 90 ton alıb) ümumi qızıl ehtiyatını 497 tona çatdırıb və bu onun ümumi ehtiyatlarının 21%-i həddindədir.

İkinci ən böyük alıcı Azərbaycan Dövlət Neft Fondu olub. Fond yanvar-mart aylarında 19 ton qızıl alaraq qızıl ehtiyatını 165 tona çatdırıb. Hazırda Fondun portfelində qızılın payı 26% təşkil edir. Digər əsas alıcılar Çin (13 ton), Qazaxıstan (6 ton), (Çexiya 5 ton), Türkiyə (4 ton), Hindistan (3 ton), Qətər (3 ton) və Misir (1 ton) olub”.

S.Əliyev qeyd edib ki, Özbəkistan, Rusiya, Qırğızıstan mərkəzi bankları isə bu qiymətli metalların bir hissəsini satmalı olublar. I rübdə onların qızıl satışı müvafiq olaraq 15 ton, 3 ton, 2 ton olub.

Firuzə Əliyeva
Sfera.az

Banklar qızıl alışını artırıb - RƏQƏMLƏR